Алматыда бұрын Қайрат Боранбаевқа тиесілі болған «Алмалы» сауда орталығы балалар ғылыми мұражайына айналады. Бұл туралы қалалық мәслихаттың кезектен тыс сессиясында қала әкімі Ерболат Досаев хабарлады.
ORDA мәліметіне сәйкес, мұражай құрылысы 2025 жылы басталады. Ол ТМД елдеріндегі осындай алғашқы мекеме болып, шетелдік инвестормен серіктестікте жүзеге асырылады деп күтілуде.
Құны 12,2 млрд теңге болатын жобаны ғылыми-білім беру бастамаларымен танымал сингапурлық Science Museum Singapore бірлесіп жүзеге асыруды жоспарлап отыр.
Белгілі болғандай, Алматының «алтын шаршысында» орналасқан сауда орталығы Қайрат Боранбаевтың 2023 жылы мемлекетке қайтарған активтерінің қатарында болған. Ғимараттар қаңтар оқиғалары кезінде қатты зақымданып, сауда орталығын қалпына келтіру жоспарлары іске аспаған.
Еске салайық, былтырғы наурызда Боранбаев, оның бизнес-серіктесі Роман Наханов және QazaqGaz бұрынғы төраға орынбасары Тайыр Жанұзақ квазимемлекеттік секторда ерекше ірі көлемде қаражат жаналау үшін 8 жыл бас бостандығынан айыруға сотталды.
Кейін үкім күшін жойды, өйткені Боранбаев тергеумен келісімге келген. Сонымен бірге БАҚ-та былтырғы маусымда ол 14,5 млрд теңге көлеміндегі материалдық шығынды өтегені туралы ақпарат тарады.
Сонымен қатар, Қайрат Боранбаев өз еркімен мемлекет меншігіне құны 90 млрд теңгеден астам активтерді қайтарып, Білім беру инфрақұрылымын қолдау қорына 30 млрд теңге аударғаны хабарланды.
Көп ұзамай Боранбаев прокурормен келісімге келіп, кінәсін мойындады, содан кейін оның мерзімі мүлікті тәркілей отырып 6 жыл бас бостандығынан айыруға дейін қысқартылды.
Тергеумен ерікті ынтымақтастық аясында ол мемлекет пайдасына болжамды құны 35,4 млрд теңге болатын «Қаражанбас солтүстік» мұнай-газ кен орнын, құны 9 млрд теңгеден астам «КазТурбоРемонт Сервис орталығы» ЖШС, құны 14 млрд теңге «АзияГазШұнжа» ЖШС және тағы басқа да көптеген мүлікті берді.
Кейінірек сот кәсіпкердің өтінішін қанағаттандырып, жазаның өтелмеген бөлігін бас бостандығын шектеумен ауыстырды.
2023 жылдың қарашасында Боранбаев колониядан шықты. Осы жылдың мамырында ҚМА төрағасының орынбасары Жеңіс Елемесов журналистерге Боранбаев мырзаның мемлекетке 134,5 млрд теңге қайтарғанын айтты.