Солтүстік Қазақстан облысында Мағжан Жұмабаев ауданының Жастар ресурстық орталығының бухгалтері сотталды. Ол бюджет қаражатын жымқырғаны үшін кінәлі деп танылды.
Облыс прокуратурасының мәліметінше, 2020 жылдың қаңтарынан 2025 жылдың ақпанына дейін мекеме бухгалтері жеке шотына жалақылар мен өзге де төлемдерді жалпы сомасы 17 млн теңге мөлшерінде заңсыз аударған.
Ағымдағы жылдың наурыз айында прокуратура ҚК 189-бабы 4-бөлігінің 2-тармағы бойынша («Сеніп тапсырылған бөтен мүлікті иемденіп алу немесе ысырап ету») сотқа дейінгі тергеуді тіркеді.
Қыркүйек айында аудандық сот бухгалтерді кінәлі деп танып, 7 жылға материалдық жауапкершілікке және бухгалтерлік есепке байланысты лауазымдарды атқаруға тыйым сала отырып, 7 жыл бас бостандығынан айыру жазасын тағайындады. Үкім заңды күшіне енді.
Айта кету керек, ҚР ҚК 74-бабына сәйкес, сотталғанның кәмелетке толмаған баласының болуына байланысты жазаны өтеу кейінге қалдырылды — 2028 жылдың 27 қыркүйегіне дейін, яғни бала 14 жасқа толғанға дейін. Мемлекетке келтірілген залал ішінара өтелді.
Еске сала кетейік, бұған дейін Батыс Қазақстан облысы Теректі ауданында мемлекеттік «Орталықтандырылған кітапхана жүйесі» мекемесінің екі қызметкері қызметкерлердің жалақысына арналған шамамен 46 млн теңге қаражатты жымқырғаны үшін кінәлі деп танылған болатын.