Бас прокуратура және Қаржылық мониторинг агенттігінің (ҚМА) қызметкерлері Біріккен Араб Әмірліктерінен коммерциялық ұйымдардың бірінің бас директорын экстрадициялады. Ол Ақтөбе облысында мұнайдың заңсыз айналымына күдіктеледі.
Бас прокуратура баспасөз қызметінің мәліметінше, 2022-2023 жылдары күдікті бір топ адамдармен бірге жалпы сомасы 300 млн теңгеден астам мұнайды заңсыз сатқан.
Қылмыс жасағаннан кейін фигурант жасырынып, халықаралық іздеу жарияланған. Өткен жылы қылмыскер Дубайдан ұсталып, Бас прокуратураның сұрауы бойынша Қазақстанға экстрадицияланды. Қазіргі уақытта күдікті тергеу изоляторына орналастырылды.
Тандалған қылмыс үшін мүлкі тәркіленіп, 3 жылдан 6 жылға дейін бас бостандығынан айыру түріндегі жаза көзделген.
Еске салайық, бұған дейін Ресей Федерациясынан аса ірі көлемдегі алаяқтыққа күдіктелген қазақстандық экстрадицияланған болатын. 2020–2022 жылдары ол құрылыс компаниясын басқарған.
Хабарланғандай, ер адам бір топ адамдармен бірлесіп, жалған шарттар жасасып, ақшаны үлестес фирмалар арқылы аударған. Осылайша «Самұрық-Энерго» АҚ еншілес ұйымынан 8,5 млрд теңгеден астам қаражат жымқырылған.