Алматы облысының табиғат қорғау прокуратурасы Қарасай ауданының Иргелі ауылдық округінде заңсыз қоқыс үйіндісін ұйымдастыру фактісі бойынша қылмыстық істер қозғады.
Vlast.kz мәліметінше, Иргелі ауылдық округіндегі Көксай кентінің тұрғындары көп жылдар бойы үйлерінің жанында орналасқан рұқсат етілмеген қоқыс үйіндісімен күресіп келеді. Жергілікті тұрғындар Алматының әртүрлі бөліктерінен әкелінетін қоқыстан шығатын тұрақты жағымсыз иіске және үнемі тұтануға шағымданады.
Ауылдық округ әкімдігі қоқыс үйіндісі ретінде пайдаланылып жатқан 7 жер учаскесінің бастапқыда «шаруа қожалығын жүргізу үшін» мақсатты тағайындалғанын хабарлады. Жергілікті билік олардың иелеріне аумақтарды құрылыс қалдықтарымен және топырақпен жабу туралы нұсқама берді.
«Бүгінгі күні Алматы облысының табиғат қорғау прокуратурасы экологияға зиян келтіргені үшін жер пайдаланушыларға қатысты қылмыстық істер қозғады», - деп хабарлады Иргелі аудандық әкімдігі.
Өз кезегінде Алматы облысының әкімдігі іс жүзінде қоқыс полигоны 12 жер учаскесін қамтитынын мәлімдеді.
Қыркүйек айында құқық қорғау органдарының, жергілікті билік өкілдерінің және облыстың экология департаментінің қатысуымен арнайы комиссия тексеру жүргізді. Оның қорытындысы бойынша Иргелі ауылдық округінің әкімдігіне учаскелердің иелерін анықтап, оларды әкімшілік жауапкершілікке тарту тапсырылды.
«Егер жер учаскелерінің мақсаты бойынша пайдаланылмағаны анықталса, заңнамаға сәйкес оларды мемлекет меншігіне қайтару үшін шаралар қолданылуы мүмкін», - деп мәлімдеді Алматы облысының әкімдігі.
Сонымен қатар ауылдық округ әкімдігіне қатысты қандай шаралар қолданылатыны хабарланбады.
Еске сала кетейік, бұрын хабарланғандай, Алматы облысы Қарасай ауданы Иргелі ауылдық округіндегі «Асыл Арман» тұрғын үй кешенінің 25 мың тұрғыны жарықсыз қалған болатын.