Алматыда нүктелік құрылысқа байланысты жаңа жанжал туындап отыр. Әл-Фараби даңғылындағы үйлерде тұратын Академик қалашық тұрғындары Мемлекет басшысына бейнеүндеу жазды. Оған себеп – олардың үйлерінің алдындағы учаскеде тұрғын үй кешенінің салынуы.
Telegram-арнасының «HALYQSTAN» мәліметінше, қала тұрғындары құрылысты тоқтатып, жерді мемлекет меншігіне қайтаруды және онда саябақ пен төтенше жағдайларда тұрғындарды жинау алаңын жабдықтауды талап етеді.
«Біз ағаш отырғызуға және аумақты күтуге өзіміз қатысуға дайынбыз. Ең бастысы – ашық кеңістікті сақтап, кейін түзету мүмкін болмайтын қателіктерге жол бермеу», — делінген хабарламада.
Үндеу авторларының айтуынша, учаске сейсмикалық қауіпті аймақта – тікелей тектоникалық жарылымда орналасқан. Сонымен қатар, құрылыс тау ауасының соңғы өту жолын жауып тастауы мүмкін, бұл экологиялық жағдайды нашарлатады.
Сонымен бірге учаскенің астынан жоғары вольтты кабельдер өтеді, ал ауданның қолданыстағы инфрақұрылымы жаңа тұрғын үй кешендерімен шамадан тыс жүктелген.
Басқа қауіптердің қатарында – тозған коммуникациялар және көлік мәселесі: «Академик қалашық» аялдамасына апаратын жалғыз жол дәл осы даулы учаскеден өтеді. Егер ол жабылса, тұрғындар қоғамдық көлікке қол жеткізе алмай қалады.
Қала тұрғындарының ақпараты бойынша, қоғамдық тыңдаулар өткізілмеген және олар құрылысқа ресми келісім бермеген. Учаскенің өзі жеке меншікте және тұрғындардың айтуынша, игерілмегені үшін айыппұлдардан құтылу мақсатында бірнеше рет қайта сатылған.