Әскери бөлімдердің бірінде Абай облысы Аягөз гарнизонының мерзімді әскери қызметшісі қаза тапты. Қорғаныс министрлігі баспасөз қызметінің мәліметінше, оқыс оқиға оқу-жаттығу кезінде болған.
«13 маусымда оқу-жаттығу өткізу барысында қауіпсіздік шараларын бұзуға жол берілді. Аягөз гарнизоны әскери бөлімдерінің біріндегі мерзімді әскери қызметші өмірмен сыйыспайтын жарақат алды», - делінген хабарламада.
Оқиға бойынша қызметтік тексеру тағайындалып, қылмыстық іс қозғалды.
«Кінәлілер мен лауазымды тұлғалар Қазақстан Республикасының Қылмыстық кодексі және ҚР Қарулы Күштерінің Тәртіптік жарғысы шеңберінде тиісті жазаға тартылады», - деп хабарлады ведомстводан.
Естеріңізге сала кетейік, бұған дейін Ақтауда № 25744 әскери бөлімінің әскери қызметшісі жаңадан келген сарбаздардың басына табуретка және шоқпармен ұрған болатын. Оған қатысты қылмыстық іс қозғалған, алайда кейін тараптардың татуласуына байланысты тоқтатылған еді.