Премьер-министр Олжас Бектенов үкімет резервінен 39,9 млрд теңге бөлу туралы қаулы етті, бұл қаражат «Ауылдық денсаулық сақтауды жаңғырту» ұлттық жобасы аясында медициналық мекемелер салу және жаңғыртуға жұмсалады.
Үкімет баспасөз қызметінің мәліметінше, 655 алғашқы медициналық-санитариялық көмек (АМСК) нысанын салу және орталық аудандық ауруханаларды жаңғырту көзделген. Ұлттық жоба Президенттің Қазақстан халқына Жолдауында айтылған тапсырмасын орындау үшін жүзеге асырылады.
«Жобаларды қаржыландыру облыс әкімдіктерінің жобалық-сметалық құжаттама (ЖСҚ) дайын болған сайын берілген өтінімдеріне сәйкес жүзеге асырылады. Осыған байланысты үкімет резервінен 39 млрд 987 млн теңгеден сәл астам қаражат ЖСҚ дайын болған ауылдық елді мекендердегі 297 алғашқы медициналық көмек нысанын салуға жұмсалады. Олардың қатарында медпункттер, фельдшерлік-акушерлік пункттер және дәрігерлік амбулаториялар бар», - делінген хабарламада.
Сонымен қатар, бөлінген қаражаттың бір бөлігі келесілерге жұмсалуы жоспарлануда:
- Арқалық өңірлік ауруханасы перзентхана ғимаратын күрделі жөндеуді аяқтауға;
- Степногор көпбейінді қалалық ауруханасының екі блогын күрделі жөндеуге;
- Атбасар көпбейінді ауданаралық ауруханасының бас ғимаратын күрделі жөндеуге;
- Балқаш қаласының Орталық ауруханасын күрделі жөндеуді бастауға;
- Балқаш қаласының Көпбейінді ауруханасында ангиографиялық операциялық бөлменің бас ғимаратына қосымша ғимарат салу және ангиографиялық қондырғыны орналастыруға;
- Шиелі көпбейінді орталық аудандық ауруханасы ғимаратына блок қосып қайта жаңғырту және сол жерде 30 төсек-орындық жұқпалы аурулар бөлімшесін салуға.