Қаржылық мониторинг агенттігі (ҚМА) Тайландтан ерекше ірі көлемдегі есірткі заттарын жеткізуге тосқауыл қойды.
«DHL» уақытша сақтау қоймасын тексеру кезінде Астана бойынша ҚМА департаментінің қызметкерлері қызметтік-іздестіру итін қолдана отырып, кедендік бақылау аймағында халықаралық пошта жөнелтілімдері – 3 сәлемдеме тауып, олардың ішінен жалпы салмағы 3,5 кг есірткі заты – каннабис сығындысы (гашиш майы) анықталды», - деп хабарлады ведомствоның баспасөз қызметі.
Нәтижесінде құқық қорғау органдары төрт күдіктіні ұстап, олардың тұрғылықты жерлерінде тінту жүргізіп, салмағы 787 гр. марихуана қорын, сондай-ақ есірткі заттарын өлшеу және орау үшін қажетті заттарды тапты.
«Осы факті бойынша сотқа дейінгі тергеу басталды. 4 күдіктіге қатысты "қамауда ұстау" түріндегі бұлтартпау шарасы санкцияланды. ҚР ҚПК 201-бабының талаптарына сәйкес өзге мәліметтер жария етуге жатпайды», - делінген хабарламада.