Солтүстік Қазақстан облысында (СҚО) сот адамды лицензиясыз заңсыз кәсіпкерлік және микроқаржы қызметі үшін 2 жыл бас бостандығын шектеуге соттады. Тергеу деректері бойынша, ол қарыз шарты мен сатып алу-сату шарттарын қолдана отырып, 78 эпизод бойынша қарыз берген.
ТЕРГЕУ НЕ АНЫҚТАДЫ
Тергеу барысында СҚО бойынша Қаржы мониторингі агенттігі (ҚМА) департаментінің қызметкерлері заңсыз қарыз берудің 78 эпизодының мән-жайын анықтады.
Әдетте, қарыз алушылар ақшаға өте мұқтаж және банктік қаржыландыру алу мүмкіндігі жоқ азаматтар болды.
ҚАНДАЙ СХЕМАЛАР ҚОЛДАНЫЛДЫ
Тергеу қарыз берудің екі схемасын анықтады. Бірінші жағдайда тараптар қарыз шартын нотариалды түрде ресімдеді, алайда мәміленің нақты шарттары құжатта көрсетілмеді. Көрсетілген сомаға қарыз алушыға берілген қаражат пен қарызды пайдаланған барлық кезеңдегі сыйақы кірді, ал ақшаны қайтару мүлік кепілімен қамтамасыз етілді.
Екінші жағдайда қарыз сатып алу-сату шартының астына жасырылды. Мүлік үшін ақша іс жүзінде берілмеді, ал мүліктің өзі қарызды қамтамасыз ету ретінде пайдаланылды. Ақша қайтарылғаннан кейін шарт бұзылып, мүлік иесіне қайтарылды.
Осылайша, азаматтық-құқықтық мәмілелердің көмегімен іс жүзінде сыйақы мен мүлік кепілімен жүйелі түрде ақша беру жүргізілді.
СОТ ҚАНДАЙ ШЕШІМ ҚАБЫЛДАДЫ
Заңсыз қызмет нәтижесінде 774 млн теңге көлемінде қылмыстық кіріс алынды. Осы қаражат есебінен қымбат активтер сатып алынды.
Сот үкімімен мемлекет кірісіне 6 пәтер, Toyota RAV4 автокөлігі, Kawasaki KLX250 мотоциклі, сондай-ақ 280 млн теңге тұратын бағалы қағаздар тәркіленді.
Өсімқор Е.В. 2 жыл бас бостандығын шектеуге сотталды.
Сот үкімі заңды күшіне енген жоқ.
