Шығыс Қазақстан облысының (ШҚО) бұрынғы әкім орынбасары Жақсылық Омар жасаған қылмыстарының санатына байланысты шартты түрде мерзімінен бұрын босату (ШМБ) немесе амнистия құқығын пайдалана алмайды.
ПРОКУРАТУРАДА НЕ ДЕДІ
Өскемен прокуратурасы қолданыстағы заңнама сыбайлас жемқорлық қылмыстары үшін сотталған адамдарға амнистия мен ШМБ қолдану мүмкіндігін тікелей жоққа шығаратынын нақтылады.
Сондай-ақ, мемлекеттік айыптаушы істі қысқартылған тәртіппен қарауды ескере отырып, барынша мүмкін болатын жазаны сұрағаны атап өтілді.
СОТ ҚАНДАЙ ҮКІМ ШЫҒАРДЫ
Сот үкім шығарды: Жақсылық Омар алты жыл бас бостандығынан айырылды. Оған қоса, оның мүлкі тәркіленіп, мемлекеттік қызметте лауазымдарды атқаруға өмір бойына тыйым салынды.
Қазіргі уақытта үкім заңды күшіне енген жоқ. Іс тараптары белгіленген тәртіпте оған шағымдануға құқылы.
Жақсылық Омар ШҚО әкімінің бірінші орынбасары лауазымын 2025 жылғы сәуірден бастап атқарған. Тағайындалғанға дейін ол алты жыл бойы Өскемен қаласын басқарды.