Сенаторлар ғылым, ғылымды қажетсінетін аумақтар, әлеуметтік қамсыздандыру, білім беру, денсаулық сақтау және әскери қызмет мәселелері бойынша заңды мақұлдады. Құжат ғылым қалалары мен ғылыми-технологиялық парктерді дамытудың құқықтық негізін құруды, сондай-ақ ғалымдарды қолдаудың жаңа шараларын енгізуді көздейді.
ЗАҢ ҚАНДАЙ ӨЗГЕРІСТЕРДІ КӨЗДЕЙДІ
Парламент Сенаты аппаратының басшысы Максим Споткайдың хабарлауынша, жаңа нормалар елдің ғылыми әлеуетін дамытуға, ғалымдарды қолдауға және инновацияларды енгізуге бағытталған.
Заң ғылым қалалары мен ғылыми-технологиялық парктерді дамытудың құқықтық негізін жасайды. Олар ғылыми әзірлемелерді енгізу, жоғары технологиялық өндірістерді дамыту және ғылыми жобаларды коммерцияландыру алаңдары ретінде пайдаланылатын болады.
ҒЫЛЫМИ ҰЙЫМДАР ҚАНДАЙ МҮМКІНДІКТЕР АЛАДЫ
Ғылыми ұйымдар ортақ пайдаланылатын зертханаларға тең қол жеткізе алады. Бұл ғылыми-зерттеу инфрақұрылымын неғұрлым тиімді пайдалануға және ғылыми зерттеулер жүргізу мүмкіндіктерін кеңейтуге мүмкіндік береді.
Сонымен қатар, ғылыми қызметті қаржыландыру тәртібі жеңілдетіледі. Ғылыми ұйымдар бір мезгілде бірнеше көзден, оның ішінде жер қойнауын пайдаланушылардың аударымдары есебінен қаражат ала алады.
ҒАЛЫМДАР ҮШІН ҚАНДАЙ ҚОЛДАУ ШАРАЛАРЫ ҚАРАСТЫРЫЛҒАН
Жоғары және (немесе) жоғары оқу орнынан кейінгі білім беру ұйымдары мен ғылыми ұйымдарда жұмыс істейтін жетекші ғалымдар үшін әлеуметтік демалыстың жаңа түрі енгізіледі. Бұл қосымша қолдау шарасына айналатын шығармашылық демалыс туралы болып отыр.
Сондай-ақ заң Ұлттық ғылым академиясын қаржыландыру көздерін бекітеді. Оның қызметі бюджет қаражаты және Қазақстан Республикасының заңдарында тыйым салынбаған басқа да көздер есебінен қамтамасыз етілетін болады.
МЕКТЕП БІЛІМ БЕРУ САЛАСЫНДА НЕ ӨЗГЕРЕДІ
Заңнама баспалардың мектеп оқулықтарында баспагердің кінәсынан қателер анықталған жағдайда, олардың тираждарын ауыстыру міндетін бекітеді. Мұндай оқулықтарды ауыстыру шығындарын баспалардың өздері көтеретін болады.