Алматыдағы Республикалық физика-математика мектебінің (РФММ) асханасында тағам сынамаларынан және ыдыстардан ішек таяқшасы тобының бактериялары табылды. Сонымен қатар, төрт асхана қызметкерінен алтын түсті стафилококктің тасымалдаушылығы анықталды.
ЗЕРТХАНАЛЫҚ ЗЕРТТЕУЛЕР НЕНІ КӨРСЕТТІ
Алматы қаласының санитарлық-эпидемиологиялық бақылау департаментінің деректері бойынша, зертханалық зерттеулер жекелеген дайын тағамдардың микробтық ластануын анықтады. Сондай-ақ ішек таяқшасы тобының бактериялары тағам сынамаларынан және ыдыстардан алынған жуындылардан табылды.
Асхананың тексерілген 38 қызметкерінің төртеуінен алтын түсті стафилококктің тасымалдаушылығы анықталды. Олар уақытша жұмыстан шеттетілді.
Сонымен қатар, мамандар дезинфекциялаушы құралдың жұмыс ерітіндісі белгіленген нормаларға сәйкес келмейтінін анықтады.
АСХАНАДА ҚАНДАЙ БҰЗУШЫЛЫҚТАР АНЫҚТАЛДЫ
Тексеру барысында мамандар тағамдарды және тәуліктік сынамаларды сақтау тәртібінің бұзылғанын анықтады. Асханада сондай-ақ мәзір сақталмаған, қажетті құжаттаманың және ас үй жабдықтарының таңбалауының бір бөлігі болмаған.
ҚАНДАЙ ШАРАЛАР ҚОЛДАНЫЛДЫ
РФММ-ге қатысты әкімшілік хаттама жасалды. Тамақтандыруды ұйымдастырған MasterFood компаниясына қатысты тексеру материалдары полицияға жіберілді.
Сонымен қатар, болған оқиға фактісі бойынша ҚР ҚК 304-бабының 1-бөлігімен («Санитарлық ережелерді немесе гигиеналық нормативтерді бұзу») қылмыстық іс қозғалды.
КОНТЕКСТ
13 қазанда Алматыдағы РФММ оқушыларының жаппай ауыруы туралы белгілі болды. Бастапқыда жедел ішек инфекциясының белгілері бар 47 оқушының ауруханаға жатқызылғаны хабарланды.
Ауру жағдайлары анықталғаннан кейін мектептің, интернаттың және асхананың жұмысы уақытша тоқтатылды.
22 қазанда ауруханаға жатқызылған 58 оқушының барлығы ауруханадан шығарылды. Балалар қажетті ем қабылдады.