Құрылтай Жоғарғы Соттың алты судьясының өкілеттігін тоқтатты. Осы отырыста депутаттар Құрылтай депутаты Татьяна Савельеваның өкілеттігін мерзімінен бұрын тоқтатты.
ЖОҒАРҒЫ СОТТАН КІМ КЕТТІ
Судьяларды босату туралы Президенттің ұсынымын Жоғары сот кеңесінің төрағасы Дмитрий Малахов таныстырды. Депутаттар оны пленарлық отырыста қолдады.
Өкілеттігін Марина Боровик, Нұржан Қайыпжан, Валерий Ноздрин, Мәдениет Омарбекова, Сәкен Абдолла және Аслан Тукиев тоқтатты. Мәселе ҚР Конституциясының 56-бабының 10) тармақшасына сәйкес қаралды.
СУДЬЯЛАРҒА НЕ БОЛДЫ
Сәкен Абдолла және Аслан Тукиев Президенттің 2026 жылғы 23 қыркүйектегі Жарлығымен Конституциялық соттың судьялары болып тағайындалды. Осыған байланысты Құрылтай олардың Жоғарғы Сот судьялары ретіндегі өкілеттігін тоқтатты.
Сонымен қатар Марина Боровик, Нұржан Қайыпжан, Валерий Ноздрин және Мәдениет Омарбекова құрметті демалысқа шығуына байланысты Жоғарғы Соттағы жұмысын тоқтатты.
ҚҰРЫЛТАЙДАН КІМ КЕТТІ
Осы пленарлық отырыста депутаттар Татьяна Савельеваның өкілеттігін мерзімінен бұрын тоқтатуды бірауыздан қолдады. Оның өтініші Орталық сайлау комиссиясына 2026 жылғы 6 қазанда келіп түсті.
Савельеваның кету себептері мен оның бұдан кейінгі жоспарлары нақтыланбаған. Ол Құрылтайдың жаңа құрамында 2026 жылдың тамызынан бастап жұмыс істеді. 2016 жылдан 2023 жылға дейін Савельева қаржы вице-министрі қызметін атқарды.
