Қазақстанда автомобиль жолдары саласын реформалау жөніндегі үкіметтік жұмыс тобы құрылды. Оған жол құрылысы жүйесі мен олардың сапасын бағалауды қайта қарау, құрылыс нормалары мен стандарттарын жаңарту, сондай-ақ 2026 жылғы 1 желтоқсанға дейін заңнамалық өзгерістер бойынша ұсыныстар дайындау тапсырылды.
ЖҰМЫС ТОБЫНЫҢ АЛДЫНА ҚАНДАЙ МІНДЕТТЕР ҚОЙЫЛДЫ
Жұмыс тобын құру туралы өкімге премьер-министр Олжас Бектенов қол қойды. Бастама Президенттің Қазақстан Халық Кеңесінің бірінші сессиясында қойған міндеттеріне байланысты.
Жұмыс тобы автомобиль жолдарын салудың қолданыстағы жүйесі мен орындалған жұмыстардың сапасын бағалау тетіктерін қайта қараумен айналысады. Басымдықтардың қатарында автомобиль жолдары саласын реттейтін стандарттар мен құрылыс нормаларын жаңарту да бар.
ТОП ҚҰРАМЫНА КІМДЕР ЕНДІ
Жұмыс тобын премьер-министрдің бірінші орынбасары басқарды. Оның құрамына көлік, өнеркәсіп және құрылыс, қаржы, ішкі істер, экология және табиғи ресурстар, энергетика министрліктерінің өкілдері, сондай-ақ Бас көлік прокурорының орынбасары енді.
Сонымен қатар, жұмысқа «ҚазМұнайГаз» ҰК АҚ, «ҚазАвтоЖол» ҰК» АҚ, «Жол активтерінің ұлттық сапа орталығы» РМК, «ҚазжолҒЗИ» АҚ, «Жобалардың мемлекеттік ведомстводан тыс сараптамасы» РМК және «ҚазҚСҒЗИ» АҚ өкілдері тартылды. Топқа салалық сарапшылар мен Құрылтай депутаттары да қосылды.
ЖОЛ САЛАСЫН БАСҚАРУДЫ ҚАЛАЙ ӨЗГЕРТУДІ ЖОСПАРЛАП ОТЫР
Саланы басқарудың жаңа тетігі цифрлық шешімдерді ескеруі тиіс. Оның мақсаттары — автомобиль жолдары инфрақұрылымын жақсарту, мемлекеттік қаражатты пайдаланудың тиімділігі мен ашықтығын арттыру.
Олжас Бектенов жұмыс тобына 2026 жылғы 1 желтоқсанға дейін автомобиль жолдары саласын терең реформалау, оның ішінде заңнамалық шаралар бойынша ұсыныстар әзірлеуді тапсырды.
