Энергетика министрлігі 260 мың тонна мұнайды Германия бағытындағы «Достық» мұнай құбыры бойынша транзитті түзетуге байланысты баламалы экспорттық бағыттарға қайта бөлуді жариялады. Көлемнің бір бөлігі Усть-Луга портына және Каспий құбыр консорциумы (КҚК) арқылы жіберіледі.
МҰНАЙ ҚАЛАЙ ҚАЙТА БӨЛІНДІ
Энергетика министрлігінің деректері бойынша, немістің «Шведт» МӨЗ бағытындағы транзит кестесін түзетуге байланысты экспорттық көлемдерді қайта бөлу туралы шешім қабылданды.
100 мың тонна мұнай Усть-Луга портына, тағы 160 мың тонна КҚК жүйесіне жіберілді.
«Ағындарды қайта бағыттау жүк жөнелтушілермен келісілген және операциялық сипатқа ие. Тасымалдау бағыттарының өзгеруі мұнай өндірудің жылдық жоспарының орындалуына әсер етпейді. Қолданыстағы көліктік инфрақұрылым Қазақстанға экспорттың тұрақтылығын және әлемдік нарықтарға шикізаттың үздіксіз жеткізілуін толық көлемде қамтамасыз етуге мүмкіндік береді», — деп атап өтті Энергетика министрлігінің ресми өкілі Әсел Серікпаева.
КОНТЕКСТ
Бұған дейін 1 мамырдан бастап «Достық» мұнай құбырының солтүстік тармағы бойынша Ресей аумағы арқылы Германияға қазақстандық мұнай транзиті тоқтатылатыны белгілі болды. Бұл туралы Reuters агенттігі салалық дереккөздерге сілтеме жасап хабарлады.
Кейінірек Энергетика министрі Ерлан Ақкенженов мамырдағы жеткізу кестесінде осы бағыт бойынша транзиттің нөлдік көлемі көрсетілгенін хабарлады. Шектеулердің нақты себептері аталмады, ал айтылған нұсқалар болжамдық сипатта болды.