Астанада 1,2 мың оқушы орнына шақталған жаңа мектеп салынып жатыр. «Нұра» ауданындағы нысанның құрылысына Арнайы мемлекеттік қордан 7 млрд теңге бөлінді.
ҚҰРЫЛЫС ҚАЛАЙ ЖҮРІП ЖАТЫР
Жоба Мемлекет басшысының әлеуметтік инфрақұрылымды дамыту және азаматтардың өмір сапасын арттыру жөніндегі тапсырмасы аясында жүзеге асырылуда.
Нысанда құрылыс-монтаж жұмыстары қазірдің өзінде жүріп жатыр. Құрылысты аяқтау 2026 жылдың соңына дейін жоспарланған.
АУДАНҒА НЕГЕ ЖАҢА МЕКТЕП ҚАЖЕТ
Құрылыс қажеттілігі демографиялық өсім және оқушы орындарының тапшылығына байланысты. Құрылыс аймағында қазір төрт мемлекеттік мектеп жұмыс істейді.
Жаңа мектеп қолданыстағы білім беру мекемелеріне — 84, 85, 89 және 97-мектептерге жүктемені азайтуы тиіс.
БІЛІМ БЕРУГЕ ҚАНША ҚАРАЖАТ БӨЛІНДІ
Мектеп құрылысы қайтарылған активтер есебінен қаржыландырылады. Жалпы, Үкімет 610 млрд теңгеден астам сомаға 500-ден астам әлеуметтік жобаны мақұлдады.
Қаражат ел бойынша білім беру, денсаулық сақтау, спорт және коммуналдық инфрақұрылым нысандарын салуға және жаңғыртуға бағытталады.
Білім беру инфрақұрылымына жалпы құны 64,4 млрд теңге болатын 17 жоба мақұлданды. Қаржыландыру жаңа нысандар салуға және балалар мен жастардың оқуына заманауи жағдай жасауға бағытталды.
КОНТЕКСТ
Мемлекетке қайтарылған активтерді әлеуметтік жобаларға бағыттау тетігі Қазақстанда қолданылып келеді. Бас прокуратураның мәліметінше, екі жыл ішінде активтерді қайтару комитетінің жұмысы аясында мемлекетке қайтарылған активтер көлемі 1,3 трлн теңгеден асты. 1 трлн теңгеден астамы бюджет кірісіне түсті, оның ішінде 928,6 млрд теңге ақша қаражаты және 107,7 млрд теңге мүлік бар.
Қайтарылған қаражат есебінен ел бойынша 434 нысанның құрылысы қаржыландырылды. Олардың қатарында білім беру, денсаулық сақтау, спорт, сумен жабдықтау және басқа да инфрақұрылым нысандары бар. Сонымен қатар, 151 нысан әлдеқашан аяқталды, оның ішінде екі білім беру нысаны бар.
Қайтарылған активтер есебінен әлеуметтік жобаларды жүзеге асыру тәжірибесі өңірлерде де бар. Абай облысында жалпы құны 50 млрд теңгеден астам 26 жоба жүзеге асырылуда. Аяқталған нысандардың ішінде — Семейдегі Арнаулы әлеуметтік қызметтер көрсету орталығының 2,6 млрд теңге тұратын жаңа корпусы, Аягөз ауданындағы МРТ аппаратын орналастыруға арналған 250 млн теңгеге салынған қосымша ғимарат, сондай-ақ құны 7,6 млрд теңге болатын Семейдегі Оқушылар сарайы бар.