Щучинск қаласында қатты жаңбыр мен бұршақ жауып, кейбір жолдардың су астында қалуына және көппәтерлі үйлерде ақауларға әкелді. Әлеуметтік желілерде су басқан көшелер мен кіреберістердің бейнежазбалары тарады.
ҚОЛAЙСЫЗ АУА РАЙЫ ҚАНДАЙ САЛДАРҒА ӘКЕЛДІ
Куәгерлердің айтуынша, Щучинск қаласына қатты жаңбыр мен бұршақ жауып, бірнеше минут ішінде қала тұрғындарына елеулі қолайсыздықтар туғызды. Кейбір жолдар су астында қалды.
«Қолайсыз ауа райы көп қиындық тудырды: кейбір жолдар су астында қалды, ал көппәтерлі үйлердің жекелеген кіреберістерінде ағынды құбырлар шыдай алмады», — делінген жергілікті Instagram-парақшаның жарияланымында.
Әлеуметтік желілерде су басқан көшелермен көліктердің жүріп бара жатқаны көрсетілген бейнежазбалар пайда болды. Пайдаланушылардың ең көп назарын көппәтерлі үйлердің бірінен түсірілген кадрлар аударды, онда су жоғарғы қабаттардан кіреберіске қатты ағынмен құйылып жатыр.
ӘКІМДІКТЕ НЕ ХАБАРЛАДЫ
Әкімдік көппәтерлі тұрғын үйлердің шатырын жөндеу пәтер иелерінің ортақ мүлкіне жататынын еске салды. Мұндай жұмыстар мақсатты жинақтар немесе меншік иелері жинаған өзге де қаражат есебінен жүргізіледі.
«Осы жұмыстарды жергілікті бюджет қаражаты есебінен қаржыландыру көзделмеген», — делінген хабарламада.
ТҰРҒЫН ҮЙ-КОММУНАЛДЫҚ ШАРУАШЫЛЫҚ БӨЛІМІНДЕ НЕ ТҮСІНДІРДІ
Бурабай ауданының тұрғын үй-коммуналдық шаруашылығы (ТҮКШ) және тұрғын үй инспекциясы бөлімінің мәліметінше, «Тұрғын үй қатынастары туралы» Заңның 42-бабының 1-тармағына сәйкес, пәтер және тұрғын емес үй-жайлардың меншік иелері кондоминиум объектісін басқару нысанын — мүлік иелерінің бірлестігі (МИБ) немесе жай серіктестікті таңдауға міндетті.
Ведомство сонымен қатар олардың көппәтерлі тұрғын үйлердің баланс ұстаушысы емес екенін және шатырды жөндеуді бюджет қаражаты есебінен жүзеге асырмайтынын атап өтті.