Қазақстанның ішкі істер министрі Ержан Саденов жаңалықтар ленталары бойынша криминогендік жағдай туралы қорытынды жасауға болмайтынын мәлімдеді. Полиция күніне арналған сұхбатында ішкі істер министрлігінің (ІІМ) басшысы масаң күйде көлік жүргізгені үшін жазаны жеңілдетуге қарсы шығып, «Айыппұлстан» туралы сынға түсініктеме берді.
ІІМ БАСШЫСЫ ҚЫЛМЫСТЫЛЫҚ ТУРАЛЫ НЕ ДЕДІ
Polisia.kz деректері бойынша, Ержан Саденов қылмыстар туралы хабарламалардың көп болуы криминогендік жағдайдың нашарлағанын білдірмейтінін айтты.
«Жаңалықтар ленталарына сүйене отырып, криминогендік жағдай туралы қорытынды жасауға болмайды. Ақпарат көздерінің саны айтарлықтай көбейгенін ескеру қажет. Бұрын қылмыстар туралы жай ғана аз айтатын», — деді ол.
Министрдің айтуынша, соңғы жылдары елде қылмыстылықтың тұрақты төмендеуі байқалады. 2026 жылы тіркелген қылмыстар саны өткен жылдың осы кезеңімен салыстырғанда 9%-ға, немесе 3,6 мыңға қысқарды.
Сондай-ақ, ІІМ басшысы атап өткендей, қарақшылық шабуылдар саны 40%-ға жуық, тонаулар 20%-дан астамға азайды. Ұрлық, мал ұрлығы, бұзақылық, ауыр және аса ауыр қылмыстардың саны төмендеп келеді.
ЕРЖАН САДЕНОВ «АЙЫППҰЛСТАН» ТУРАЛЫ СЫНҒА НЕ ДЕП ЖАУАП БЕРДІ
ІІМ басшысы Қазақстанның «Айыппұлстан» екендігі туралы кең таралған пікірге бөлек тоқталды. Ержан Саденовтың сөзінше, айыппұлдар бүкіл әлемде қолданылады және тәртіпті сақтау құралдарының бірі болып табылады.
Министр жаза саналы түрде ереже бұзғандарға қолданылатынын, ал оның басты мақсаты азаматтардың қауіпсіздігін қамтамасыз ету екенін атап өтті.
ІІМ БАСШЫСЫ НЕЛІКТЕН МАС ЖҮРГІЗУШІЛЕРГЕ ЖЕҢІЛДІКЕРГЕ ҚАРСЫ ШЫҚТЫ
Ержан Саденов сондай-ақ Қазақстан тарихындағы алғашқы әкімшілік амнистия аясында талқыланып жатқан масаң күйде көлік жүргізгені үшін жүргізуші куәлігінен айыру мерзімдерін қысқарту ұсыныстарына түсініктеме берді.
ІІМ басшысы мұндай бастамаларды қолдамайтынын мәлімдеді. Оның сөзінше, жазаны жеңілдету масаң күйде жүргізуді ынталандыруды білдіреді, ал рульде абсолютті сақтық принципі өзгеріссіз қалуы керек.
Министрдің хабарлауынша, 2026 жылдың басынан бастап масаң жүргізушілердің кінәсінен 200-ден астам ЖКО болып, онда 300-ге жуық адам зардап шеккен, өлім жағдайлары тіркелген.
«Адам қайғысының себебі болуы мүмкін кез келген алғышарттарды жою керек», — деп атап өтті Ержан Саденов.
МИНИСТР ТАҒЫ ҚАНДАЙ МӘЛІМДЕМЕЛЕР ЖАСАДЫ
Сұхбатында Ержан Саденов мынаны хабарлады:
- Қазақстанда ескерту институты жұмыс істейді және әлеуетті құқық бұзушыларға 7 мыңнан астам ескерту жасалды;
- азаматтардың құқық бұзушылықтар туралы әрбір хабарламасы тексеріледі, ал жалған арыздар үшін жауапкершілік сақталады;
- елде құқық қорғау жүйесін цифрландыру жалғасуда;
- полиция қызметкерлерін даярлау кезінде ақпараттық технологиялар, аналитика және коммуникация саласындағы білімге ерекше көңіл бөлінеді.
