Мердігерлік ұйымның екі қызметкері 22 сәуірде Солтүстік Қазақстан облысы Айыртау ауданының Саумалкөл ауылында қаза тапты. Бұл қайғылы оқиға кәріз сорғы станциясындағы жұмыс кезінде болды.
НЕ БОЛДЫ
Солтүстік Қазақстан облысы полиция департаментінің (СҚО ПД) мәліметі бойынша, кәріз сорғы станциясында жөндеу жұмыстары кезінде мердігерлік ұйымның екі ер адам — электрик және слесарь қаза тапты.
«Еңбекті қорғау ережелерін бұзу фактісі бойынша полиция сотқа дейінгі тергеуді бастады», — деп хабарлады СҚО ПД баспасөз қызметі.
ӨЛІМНІН АЛДЫН АЛА СЕБЕБІ
Алдын ала ақпарат бойынша, жұмысшылар газбен улану салдарынан қаза табуы мүмкін. Болжам бойынша, бұл метан және күкіртсутек болуы ықтимал.
Оқиғаның нақты мән-жайы анықталып жатыр.
КОНТЕКСТ
Қазақстандағы өндірістік нысандарда жұмысшылардың қаза болуы қауіпсіздік техникасын сақтау, еңбек жағдайларын бақылау және кәсіпорындардың төтенше жағдайларға дайындығы мәселелеріне назар аударады.
Бұған дейін Абай облысындағы KAZ Minerals кенішінде газ шығып, салдарынан бір жұмысшы қаза тапты. Оқиға тағы екі адамның ауруханаға жатқызылуына әкелді, болған оқиға бойынша қылмыстық іс қозғалды.