В Ақмола облысында аудандық емхананың дәрігері үш жас жігіттен әскери қызметтен мерзімді шегеруге уәде беріп ақша алғаны үшін алаяқтықта кінәлі деп танылды. Сот оған бас бостандығын шектеу түріндегі жаза тағайындады.
СОТ НЕНІ АНЫҚТАДЫ
Ақмола облысы Целиноград аудандық сотының мәліметінше, қылмыстық іс аудандық емхананың дәрігері М.-ға қатысты ҚР ҚК 190-бабы 3-бөлігінің 4-тармағы («Қызмет бабын пайдалана отырып, бірнеше рет жасалған алаяқтық») бойынша қаралды.
Сот анықтағандай, 2025 жылғы қазаннан желтоқсанға дейін сотталушы үш жас жігітті адастырып, қызмет үшін ақы төлеу шартымен әскери қызметтен мерзімді шегеруді ұсынған.
Жәбірленушілер Н., Б. және Х. дәрігердің шотына әрқайсысы 350 мың теңгеден аударған. Іс материалдарына сәйкес, сотталушы алған қаражатты өз қалауы бойынша жұмсаған.
СОТТА НЕ БОЛДЫ
Сот отырысы барысында М. кінәсін мойындап, өкініп, жәбірленушілерге материалдық залалды толығымен өтеді.
Жәбірленушілер сотқа өтемақыны толық көлемде алғандарын және сотталушыға шағымы жоқ екенін хабарлады. Сот бұл мән-жайларды жаза тағайындау кезінде ескерді.
Жеңілдететін мән-жайлар ретінде шын жүректен өкіну және кінәні мойындау да көрсетілген.
СОТ ҚАНДАЙ ЖАЗА ТАҒАЙЫНДАДЫ
Сот үкімімен М.-ға 3 жыл 6 ай бас бостандығын шектеу тағайындалды. Сондай-ақ ол 1 жыл мерзімге медициналық қызмет көрсетумен айналысу құқығынан айырылды.
Сонымен қатар, сотталушыға бас бостандығын шектеудің барлық мерзіміне заңнамада көзделген міндеттерді жүктей отырып, пробациялық бақылау белгіленді.
Үкім заңды күшіне енген жоқ.