В Жамбыл облысында тексеру нәтижесінде 96 процедуралық кабинет жұмысын тоқтатты. Оның 56 кабинеті лицензиясыз қызмет еткен. Сондай-ақ 135 стоматологиялық клиника тексеруден өтті.
ТЕКСЕРУЛЕР ҚАНДАЙ НӘТИЖЕ КӨРСЕТТІ
Денсаулық сақтау министрлігі баспасөз қызметінің дерегінше, бақылау іс-шараларының қорытындылары туралы денсаулық сақтау министрі Ақмарал Әлназарова өңірдің медициналық қоғамдастығымен кездесуде хабарлады.
Ведомство басшысының атап өтуінше, соңғы екі жылда Жамбыл облысында денсаулық сақтау нысандарында бақылау іс-шаралары айтарлықтай күшейтілген. Тексеру нәтижесінде 96 процедуралық кабинеттің қызметі тоқтатылды, оның 56-сы лицензиясыз жұмыс істеген. Сонымен қатар, 135 стоматологиялық клиника тексеруден өтті.
МИНИСТР ҚАНДАЙ ТАПСЫРМАЛАР БЕРДІ
Ақмарал Әлназарованың айтуынша, өңірде халықтан түсетін өтініштер саны артып келеді. Шағымдардың негізгі бөлігі медициналық ұйымдардағы медициналық көмектің сапасы мен ұйымдастырылуына байланысты.
Денсаулық сақтау министрі бастапқы медициналық-санитариялық көмек ұйымдарының онкологиялық ауруларды ерте анықтау жөніндегі жұмысын күшейтуді және онкологиялық қырағылыққа тұрақты мониторинг жүргізуді тапсырды.
Диагностикалық зерттеулердің сапасы мен қолжетімділігіне ерекше назар аудару ұсынылды. Атап айтқанда, колоноскопиялық зерттеулердің сапасын арттыру, колоректалды қатерлі ісікті ерте анықтау үшін гемокульт-тесттерін қолдануды кеңейту, сондай-ақ ПАП-тесттер мен маммографиялық зерттеулердің сапасын жақсарту туралы айтылды.
ТУБЕРКУЛЕЗДІҢ АЛДЫН АЛУ БОЙЫНША ҚАНДАЙ ШАРАЛАР ҚОЛДАНЫЛАДЫ
Тапсырмалардың жеке блогы туберкулездің алдын алуға арналды. Атап айтқанда, туберкулезбен ауыратындармен қарым-қатынаста болған балаларды профилактикалық емдеумен жүз пайыз қамту міндеті қойылды.
Сондай-ақ министр халық арасында ақпараттық-түсіндіру жұмыстарын жүргізу қажеттілігіне назар аударды.
ДЕНСАУЛЫҚ САҚТАУ ЖҮЙЕСІНІҢ НЕГІЗГІ МІНДЕТІ ДЕП НЕНІ АТАДЫ
Ақмарал Әлназарованың айтуынша, денсаулық сақтау жүйесінің негізгі міндеті – инфрақұрылымды дамыту ғана емес, сонымен қатар медициналық көмектің сапасы мен қолжетімділігін арттыру, әсіресе бастапқы буын деңгейінде.