Көкшетауда мемлекетке қайтарылған активтер есептелетін Арнайы мемлекеттік қордан қаржыландырылатын ірі спорттық-мәдени кешеннің құрылысы аяқталуда.
Үкіметтің баспасөз қызметінің мәліметінше, жобаны іске асыруға 12,6 млрд теңге бөлінген. Хабарланғандай, нысан өңірдегі ең ірі спорт алаңдарының біріне айналады. Ішінде бокс, күрес, ауыр атлетика және кроссфитке арналған мамандандырылған залдар қарастырылған.
Жабдықтар олимпиадалық стандарттарға сәйкес сатып алынуда, бұл Көкшетауда республикалық және халықаралық деңгейдегі жарыстарды, оның ішінде IBA (Халықаралық бокс қауымдастығы) турнирлерін өткізуге мүмкіндік береді.
Кешен аумағында екі футбол алаңы, жеңіл атлетика аймақтары, ойын түрлеріне арналған алаңдар, сондай-ақ ядро мен найза лақтыру секторлары жабдықталуда. Жоба аз қозғалатын топтар үшін арнайы жабдықтарды қарастырады.
Сонымен қатар, жасанды құз қабырғасы мен өрт-қолданбалы спорт мұнарасы бар әмбебап зал ашу жоспарлануда. Атап өтілгендей, осы базада ҚР ТЖМ Азаматтық қорғау академиясының курсанттары даярлықтан өте алады. Мәдени іс-шаралар үшін заманауи мультимедиялық жүйелермен жабдықталған 650 орындық зал қарастырылған.
Нысандағы негізгі құрылыс жұмыстары аяқталды, ішкі әрлеу, абаттандыру және инженерлік желілерді қосу жалғасуда. Кешеннің жалпы дайындығы 85% құрайды. Пайдалануға беру ағымдағы жылдың соңына дейін жоспарланған.
Жобаны іске асыру өңір тұрғындарының жыл бойы спорттық қызметтерге қол жеткізуін кеңейтуге және халықтың дене шынықтырумен айналысуға тартылуын арттыруға мүмкіндік береді деп күтілуде.
Еске салайық, қаңтар айында хабарланғандай, қайтарылған активтер есебінен Алматы облысы Кеген ауданы Жалағаш ауылында құны 1,1 млрд теңге болатын спорт кешенін салу жоспарланған болатын.
Ақпан айында Арнайы мемлекеттік қор есебінен қаржыландырылатын жобалар тізбесіне Астанадағы Қажымұқан Мұңайтпасов атындағы стадионның құрылысы енгізілді. Нысанды салуға 17,3 млрд теңгеден астам қаражат бөлінді.