Атырау облысының Мақат ауданында 12 көпбалалы отбасы жаңа қонысқа көшті. Олардың тоғызы Доссор кентіндегі өз үйлеріне, тағы үшеуі Мақат кентіне көшіп барды. Жыл басынан бері ауданда әлеуметтік осал санаттағы 48 отбасы баспана алды.
ОТБАСЫЛАР ҚАЙДАН БАСПАНА АЛДЫ
Атырау облысының өңірлік коммуникациялар қызметі хабарлағандай, салтанатты рәсімде отбасыларға жаңа үйлердің кілттері табысталды. Тұрғын үйдің басым бөлігі – 9 үй Доссор кентінде, 3 үй аудан орталығы Мақат кентінде орналасқан.
ӘКІМДІК НЕ ДЕДІ
Жаңа қоныс иелерін Мақат ауданының әкімі Азамат Мамбетов құттықтады. Оның айтуынша, жеке баспана алу – әр отбасы үшін маңызды оқиға.
«Мемлекет тарапынан көпбалалы отбасыларды қолдау және олардың өмір сүру сапасын жақсарту бойынша жүйелі жұмыс жүргізіліп жатыр. Әр үйде қуаныш, береке мен молшылық орнасын!» – деді Азамат Мамбетов.
БИЫЛ ҚАНША ОТБАСЫ БАСПАНА АЛДЫ
Әкім ауданда тұрғындарды әлеуметтік қолдау және оларды баспанамен қамтамасыз ету жұмыстары жалғасатынын атап өтті. Жыл басынан бері Мақат ауданында әлеуметтік осал санаттарға жататын 48 отбасы баспана алды.
