Атырауда техникалық және кәсіптік білім беру саласындағы мамандарға арналған инженерлік графика және CAD-технологиялар бойынша республикалық жолдастық чемпионат «CADskills-2026» - жарысы басталды.
ТЕОРИЯ ЕМЕС, ТӘЖІРИБЕ
Атырау облыстық коммуникациялар қызметінің мәліметінше, жарысқа Алматы қаласынан, сондай-ақ Қарағанды, Маңғыстау, Ақмола, Ақтөбе, Батыс Қазақстан (БҚО), Түркістан және Атырау облыстарынан 30 қатысушы қатысуда.
Чемпионаттың басты ерекшелігі - теориялық дайындыққа емес, практикалық тапсырмаларға басымдық беру. Қатысушылар нақты өндірістік жағдайларға барынша жақын жұмыстарды орындап, техникалық дағдылары мен күрделі инженерлік міндеттерді шешу қабілетін көрсетеді. Өнеркәсіпте сұранысқа ие «Инженерлік графика CAD» құзыреттілігіне ерекше назар аударылады.
Чемпионат WorldSkills халықаралық стандарттарына сәйкес, WSI (Competition Rules) жарыс ережелері мен этика кодексін сақтай отырып өткізіледі.
МАҚСАТТАР МЕН МІНДЕТТЕР
«Іс-шараның негізгі мақсаты – техникалық және кәсіптік білім беру жүйесінде мамандарды даярлау сапасын арттыру. Сонымен қатар, чемпионат инженерлік графика және CAD-технологиялар саласындағы мамандар мен халықаралық сарапшылар арасында тәжірибе алмасуға жағдай жасайды. Жарыс барысында қатысушылар металл конструкцияларымен жұмыс істеу, деректер қорына профильдерді әзірлеу және енгізу бойынша тапсырмаларды орындайды, сондай-ақ WorldSkills халықаралық стандарттарына сәйкес кәсіби құзыреттіліктерін жетілдіреді», — деді С. Мұқашев атындағы Атырау жоғары политехникалық колледжінің директоры Бағыт Шеркешбаева.
ҰЙЫМДАСТЫРУШЫЛАР МЕН ҚАТЫСУШЫЛАР
Чемпионатты ұйымдастырушылар – С. Мұқашев атындағы Атырау жоғары политехникалық колледжі «Talap» КЕАҚ – WorldSkills Kazakhstan қозғалысының ұлттық операторы, Атырау облысы әкімдігі және облыстық білім басқармасының қолдауымен.
Қатысушылар арасында WorldSkills Kazakhstan-2026 ұлттық чемпионатына үміткерлер, сондай-ақ WorldSkills Kazakhstan-2025 аймақтық кезеңдерінің жеңімпаздары бар.
