Батыс Қазақстан облысында биылғы жылы 12 аса қауіпті ауруға қарсы 11 млн бас малды вакцинациялау жоспарлануда. Бұл туралы облыстық коммуникациялар қызметіндегі брифингте БҚО ветеринария басқармасының басшысы Абзал Бралиев мәлімдеді.
МИА «Қазинформ» деректері бойынша, облысқа 7,8 млн доза препарат жеткізілді. Малды күйдіргі және аусыл ауруларына қарсы егу жоспарланса, басқа ауруларға қарсы вакцинациялау аурушаңдық деңгейіне байланысты болады. Қосымша 2,2 млн бас малға диагностикалық тексеру жүргізіледі.
Белгілі болғандай, жыл басынан бері БҚО-да 4,75 млн жануар егілді, бұл бірінші жартыжылдықтағы жоспардың 100% құрайды.
Бруцеллезге ерекше көңіл бөлінеді. Бралиевтің айтуынша, диагностика нәтижелері бойынша 444,4 мың бас ірі қара малдан (ІҚМ) 3 215-і (0,7%) ауру анықталған. 686,7 мың ұсақ малдың 649-ы (0,1%) жұқтырған.
«Бруцеллезбен ауырған жануарлар келісімшарт бойынша 8 сою пунктіне тапсырылады. 2020 жылмен салыстырғанда соңғы уақытта бруцеллезбен ауырудың төмендеуі байқалады. Дегенмен, әлі де көп жұмыс істеу керек», — деді басқарма басшысы.
Атап өтілгендей, жыл басынан бері БҚО-да ІҚМ арасында құтырудың үш жағдайы тіркелді — екеуі Бөкейорда ауданының Бисен округінде және біреуі Қазталов ауданындағы Сайқұдық қыстағында. Ошақтарда кешенді ветеринариялық іс-шаралар жүргізілді. Бралиев аймақтағы эпизоотиялық жағдайдың тұрақты болып қалатынын атап өтті.