Президент Қасым-Жомарт Тоқаевтың тапсырмасы бойынша Арнайы мемлекеттік қордан Жетісу облысында сумен жабдықтау жүйелерін дамытуға шамамен 480 млн теңге бөлінді.
Үкімет баспасөз қызметінің мәліметінше, жобаның мақсаты – әлеуметтік маңызы бар инфрақұрылымға инвестиция салу арқылы өңір тұрғындарының өмір сүру сапасын арттыру.
Белгілі болғандай, бөлінген қаражатқа Алакөл ауданындағы Қоңыр ауылында 17 км су құбыры желісін және Қаратал ауданындағы Ұмтыл ауылында 4,8 км желі салу жоспарлануда. Жұмыстар аяқталғаннан кейін мыңнан астам адам орталықтандырылған сумен жабдықтаумен қамтамасыз етіледі деп күтілуде.
Ағымдағы жылы Жетісу облысында сумен жабдықтау жүйелерін салу және реконструкциялау бойынша барлығы 18 жоба жүзеге асырылады. Жыл қорытындысы бойынша өңірде орталықтандырылған сумен қамтамасыз ету деңгейін 99,9% - 329 елді мекенге және облыстың шамамен 697 мың тұрғынына жеткізу жоспарлануда.
Еске сала кетейік, бұған дейін Арнайы мемлекеттік қайтарылған активтер қорынан 2,2 млрд теңгеден астам қаражат Қызылорда облысының ауылдарын сапалы ауыз сумен қамтамасыз етуге бағытталды.