Жетісу облысындағы Панфилов көпсалалы ауданаралық ауруханасының дәрігерлері мекеме әкімшілігі тарапынан жүйелі бұзушылықтар туралы мәлімдеді. Ұжым Президент Қасым-Жомарт Тоқаевтың атына видеоөтініш жазып, онда бас бухгалтерге, экономистке және аурухана басшылығына қатысты тексеру жүргізуді талап етті.
«Қазинформ» халықаралық ақпарат агенттігінің мәліметінше, дәрігерлер өз өтінішінде олардың ставкаларын заңсыз қысқартып жатқанын айтады: тиісті 0,5 ставканың орнына кейбіреулер небәрі 0,25 алады. Сонымен қатар, декларацияларда 350 мың теңге сомасы көрсетілгенімен, іс жүзінде қызметкерлер қолына 140 мың теңгеден аспайтын ақша алады. Бұдан басқа, дәрігерлер дәрі-дәрмек тапшылығы туралы хабарлады.
Сонымен қатар, олар аурухана жүргізушілері қызметтік көліктің ақауына байланысты ақысыз демалысқа жіберілгенін, бұл еңбек заңнамасын бұзу болып табылатынын айтты.
Облыстық денсаулық сақтау басқармасы өтініш фактісін растап, ведомство басшысының тапсырмасы бойынша арнайы комиссия құрылғанын хабарлады.
«Осы мәселе бойынша комиссия тексеру жүргізуде. Оның қорытындысы бойынша қолданыстағы заңнама шеңберінде тиісті шешімдер қабылданады», — деп түсіндірді басқарманың баспасөз қызметі.
Еске сала кетейік, сәуір айында Тараз сотында облыстық ЖИТС-тің алдын алу және оған қарсы күрес орталығының бұрынғы бас дәрігері Айбек Исаевтың ісі қарала бастағаны хабарланған болатын. Ол лауазымдық өкілеттіктерін теріс пайдаланды және бюджеттен 100 млн теңгені иемденді деген күдікке ілінген. Тергеу Исаев жеткізушілерден мерзімі өткен дәрі-дәрмектер мен медициналық бұйымдарды сатып алған деп есептейді.