Әлеуметтік желілерде белгісіз бір ер адамның полицейді ұрып жатқаны көрінетін видео таралуда. Белгілі болғандай, оқиға 2023 жылы Таразда болған.
Ulysmedia.kz мәліметінше, іс бойынша тергеу аяқталған, алайда материалдар әлі күнге дейін сотқа жіберілмеген.
Ұрып-соғуға күдікті ретінде Жамбыл облысы Мерке ауданы мәслихатының депутаты Тәуіржан Алтынбаев өтіп жатыр.
Өңірлік полиция журналистерге істің прокурорға жіберілгенін хабарлады.
«Бұл факт 2023 жылы орын алған. Қазіргі уақытта сотқа дейінгі тергеу аяқталды, тараптар істің барлық материалдарымен таныстырылды. ҚР ҚПК 300-бабының талаптарына сәйкес, айыптау актісімен қылмыстық іс құқықтық бағалау және одан әрі сотқа жіберу үшін Тараз қаласының прокурорына жолданды», – деп хабарлады полициядан.