Қаржылық мониторинг агенттігі (ҚМА) Ұлытау облысының табиғи ресурстар басқармасы басшысына қатысты қызметтік өкілеттігін теріс пайдаланды деген факті бойынша қылмыстық істі тергеуді аяқтады.
Ведомство баспасөз қызметінің мәліметінше, күдіктілер қатарында «Жезді өзенін санациялау» жобасы аясында жұмыстарды тиісінше орындамаған адамдар да бар.
Тергеу жобаны іске асыру барысында айыпталушылардың құрылыс нормаларын бұзып, жобалық құжаттамадан ауытқығанын анықтады, бұл жобалаушы мәлімдеген су көлемінің өткізу қабілетін төмендеткен.
Басқарма басшысы іс жүзінде жүргізілмеген орындалған жұмыстар актілеріне қол қойған. Құрылыс нысанына бармай-ақ, техникалық және авторлық қадағалау да орындалған жұмыстар актілеріне қол қойған.
Биылғы көктемдегі төтенше су тасқыны кезінде шенеуніктердің әрекеттері 10 жеке үйдің су астында қалуына әкелгені атап өтіледі. Су тасқыны кезінде Жезді кентінің 24 жеке үйінен 108 адам, оның ішінде 56 бала эвакуацияланды. Іс материалдары сотқа жіберілді.
Еске сала кетейік, сәуір айында Ұлытау облысындағы су тасқыны кезінде ҚМА мемлекеттік мекемемен 485,5 млн теңгеге Жезді өзенін санациялауға шарт жасасқан ЖШС-нің лауазымды тұлғаларына қатысты сотқа дейінгі тергеуді бастады.
Анықталғандай, мердігерлер жоба бойынша 282,5 млн теңгеге құрылыс-монтаж жұмыстарын орындамаған. Орындалған жұмыстар актілері бойынша сол кезде компанияларға 400 млн теңге аударылған.