Түркістан облысы Жетісай ауданы Алғабас ауылындағы жеке тұрғын үйде болған өрт салдарынан зардап шеккен екі адам жасанды желдету аппаратына (ИВЛ) қосылған.
Үкімет баспасөз қызметінің мәліметінше, қайтыс болғандардың отбасыларына барлық қажетті көмек көрсетілуде. Ауруханаға жатқызылған үш адам реанимацияда жатыр.
Белгілі болғандай, құтқарушылар келген кезде 1986 жылы туған зардап шегушілердің бірі үйден өздігімен шығып үлгерген. Оның жағдайы дене бетінің 12% күйік шалған ауыр деп бағалануда.
1991 және 2018 жылдары туған тағы екі зардап шегуші дене бетінің 30% және 11% күйігімен шұғыл түрде ауруханаға жатқызылды, олар жасанды желдету аппаратында жатыр. Көмек көрсету үшін Шымкенттен медициналық авиация бригадасы ұшып келді.
Вице-премьер Қанат Бозымбаев мынадай тапсырма бергені атап өтілді:
- әкімдік пен еңбек және халықты әлеуметтік қорғау министрлігіне — қайтыс болғандардың отбасыларына толық материалдық көмек көрсетуді қамтамасыз ету;
- денсаулық сақтау министрлігіне — зардап шегушілердің жағдайын бақылауда ұстау;
- ішкі істер министрлігіне — адамдардың қаза болу фактісі бойынша сотқа дейінгі тергеп-тексерудің барысын бақылауға алу;
- төтенше жағдайлар министрлігіне әкімдіктермен бірлесіп — тұрғын үй секторында рейдтер мен аралаулар жүргізуді. Пешпен жылыту жүйесінің жай-күйін тексеріп, анықталған бұзушылықтарды жоюды.
Естеріңізге сала кетейік, бұған дейін Түркістан облысында Жетісай ауданы Алғабас ауылындағы жеке екі қабатты тұрғын үйде ірі өрт болған еді. Тоғыз бала мен үш ересек адамды қоса алғанда, 12 адам қайтыс болды.