Шахтинск қалалық сотында Қарағанды облысының «АрселорМиттал Теміртау» АҚ көмір департаментінің «Қазақстанская» шахтасындағы өрт және бес шахтердің қазасы фактісі бойынша іс қаралды.
Өңір соттарының баспасөз қызметінің мәліметінше, сотталушылар арасында өндірістік қызмет бойынша директордың міндетін атқарушы, конвейерлік көлік учаскесінің бастығы және тағы екі адам бар.
Олар тау-кен немесе құрылыс жұмыстарын жүргізу кезінде қауіпсіздік ережелерін бұзу, абайсызда екі немесе одан да көп адамның өліміне әкеп соқты деп айыпталды.
Сот мәліметі бойынша, сотталушылар «Д6 горизонта-170 позиция 2-бис көмір конвейерлік еңісінің паспорты болмаған, металл-арка бекітпесінің қимасы мен тұтастығы бұзылған көрінетін деформациялар болған жағдайда» жұмыстарды тоқтату шараларын қабылдамай, өрт қаупі бар конвейер лентасын пайдалануға жол берген.
«Жіберілген бұзушылықтар салдарынан 17.08.2023 жылы жөндеу ауысымы кезінде «Қазақстанская» шахтасының көмір конвейерлік еңісінде өрт шықты. Өрт салдарынан бес шахтер қаза тауып, он жеті шахтердің денсаулығына орташа және ауыр зиян келтірілді», — делінген хабарламада.
Нәтижесінде сот сотталушыларды кінәлі деп танып, оларға 4 жыл бас бостандығынан айыру жазасын тағайындады.
Естеріңізге сала кетейік, 2023 жылдың тамызында Қарағанды облысында «АрселорМиттал Теміртау» АҚ көмір департаментінің «Қазақстанская» шахтасында конвейер лентасының тұтануы болды, сол кезде онда 227 адам болған. Бес шахтер қаза тапты.
Сол жылдың қазан айында тағы «АрселорМиттал Теміртау» АҚ-на тиесілі Қарағанды облысындағы Костенко атындағы шахтада метан жарылысы 46 адамның өмірін қиып, 28 шахтерге жарақат салды.
Қайғылы оқиғадан кейін Қасым-Жомарт Тоқаев компаниямен инвестициялық ынтымақтастықты тоқтатуды тапсырды. Кейін «АрселорМиттал Теміртау» Қазақстанның юрисдикциясына ресми түрде өтті. Кәсіпорынның жаңа инвесторы Андрей Лаврентьев болды, ал кәсіпорын «Qarmet» деп қайта аталды.