Астана қылмыстық істер жөніндегі ауданаралық соты шетелдік автомобильдерді заңсыз тіркеу ісі бойынша үкім шығарды. Айыпталушылар арасында 32 адам бар.
Астана қалалық соттарының баспасөз қызметінің хабарлауынша, 2021 жылдан 2022 жылға дейін айыпталушылар 312 автокөлікті заңсыз тіркеген. Сонымен қатар, олар Қазақстанға әкелінбеген 73 оң рульді және 77 сол рульді көлікті заңсыз рәсімдеген.
«ҰОҚ 3 басшысы қылмыстық топ құрып, қызметтік өкілеттігін пайдалана отырып, оны басқарған. Топтың 5 мүшесі көптеген мәмілелерге тікелей қатысып, ол үшін ақша алған. 17 қылмыскер Telegram-чаттардан оларға арналған құжаттарды сатып ала отырып, автокөліктерді рәсімдеуге қатысқан», – деді Астана қалалық соттарының баспасөз қызметі.
Сонымен қатар, қылмыскерлерге полиция қызметкерлері көмектескені, олар өздерінің қызметтік жағдайын пайдаланғаны хабарланды.
Нәтижесінде сот ұйымдасқан қылмыстық топ басшыларына 9 жыл, бес қатысушыға 6 жыл бас бостандығынан айыру жазасын тағайындады. Үш делдал алты айдан 2,5 жылға дейін бас бостандығынан айырылды. Қалған делдалдарға 2,5 жыл бас бостандығын шектеу жазасы тағайындалды.
Сонымен қатар, төрт полиция қызметкері 3,5 жыл колонияға сотталды, қалған құқық қорғау органдары қызметкерлеріне 2,5 жыл бас бостандығын шектеу жазасы тағайындалды.