Қазақстанның Экология және табиғи ресурстар министрлігі 2022–2024 жылдары мұнай өндіруші «Теңізшевройл», North Caspian Operating Company N.V. (NCOC), «Каспий Мұнай» және «Маңғыстаумұнайгаз» компанияларына жалпы сомасы 61,1 млрд теңгеден астам айыппұл салды. Бұл туралы премьер-министр Олжас Бектенов мәжіліс депутаттарының сауалына жауап бере отырып хабарлады.
БАҚ үкімет басшысына сілтеме жасап хабарлағандай, бұзушылықтар экологиялық заңнаманың сақталмауына байланысты. Мәселен, «Теңізшевройл» ЖШС-не 2,8 млрд теңгеден астам, NCOC компаниясына шамамен 12,4 млрд, «Каспий Мұнай» АҚ-на 13,7 млрд теңге және «Маңғыстаумұнайгаз» АҚ-на 32,2 млрд теңге көлемінде әкімшілік айыппұл салынды.
Олжас Бектенов үкімет қоршаған ортаны қорғау мен экономикалық даму арасындағы тепе-теңдікті сақтау үшін экологиялық заңнаманы жетілдіру бойынша дәйекті және жүйелі жұмыс жүргізіп жатқанын мәлімдеді.
«Экологиялық кодекс аясында I санаттағы кәсіпорындар үшін өндірісті жаңғырту және автоматтандырылған мониторинг жүйелерін енгізу көзделген. Қолжетімді үздік технологияларды қолдана отырып, кешенді экологиялық рұқсаттар жүйесі енгізілді. Талаптар орындалмаған жағдайда айыппұлдар және эмиссиялар үшін төлем мөлшерлемелерін 2, 4 және 8 есеге арттыру, сондай-ақ шығарындылар нормативтерінен асып кеткені үшін жауапкершілік күшейтілді», - деп жауап берді үкімет басшысы.
Ол сондай-ақ кодекстің талаптары өнімді бөлу туралы келісімдерге қатысушыларды қоса алғанда, Каспий шельфінің барлық жер қойнауын пайдаланушыларға қолданылатынын атап өтті.
Премьер-министрдің айтуынша, Теңіз жобасы және Солтүстік Каспий бойынша келісімдер экологиялық стандарттар бөлігінде артықшылықтарды қамтымайды және мердігерлерді Қазақстанның табиғатты қорғау заңнамасын сақтауға міндеттейді.
«Сонымен қатар, North Caspian Operating Company N.V. және «Теңізшевройл» ЖШС мұнай компанияларының қоршаған ортаны қорғау саласындағы қызмет шарттары экологиялық рұқсаттарда белгіленген, олардың шеңберінде кәсіпорын қызметінің қоршаған ортаға теріс әсерін болдырмауға бағытталған табиғатты қорғау іс-шараларының жоспарлары бекітілген», - деп хабарлады Бектенов.
Үкімет басшысының айтуынша, қоршаған ортаны қорғау саласындағы уәкілетті орган мемлекеттік экологиялық бақылауды жүзеге асырады, ол тұрақты тексерулерді, өндірістік процестердің мониторингін және экологиялық таза технологияларды енгізуді қамтиды.