Қаржылық мониторинг агенттігінің (ҚМА) департаменті «Атырау мұнай өңдеу зауыты» (АМӨЗ) ЖШС басшылығына қатысты сотқа дейінгі тергеуді бастады.
ҚМА баспасөз қызметінің мәліметінше, тергеу кәсіпорын басшылығының лауазымдық өкілеттіктерін теріс пайдалану фактісі бойынша жүргізілуде. Тергеушілердің нұсқасы бойынша, бұл ауыр зардаптарға әкеп соқты - мемлекетке ерекше ірі залал келтірілген.
Айта кетейік, қаңтар айында АМӨЗ-дің жаңа бас директоры Ғалымжан Жұсанбаев болды. Алайда бір апта бұрын «ҚазМұнайГаз» баспасөз қызметі оның жұмыстан босатылғаны туралы хабарлаған болатын.
Бұған дейін АМӨЗ-дің бұрынғы бас директоры Шұхрат Данбай лауазымдық өкілеттіктерін теріс пайдаланудың төртінші эпизоды бойынша кінәлі деп танылғанын жазған едік.
АМӨЗ басшысы бола тұра, жабдықты орнатушы ақауларды жоймағанына қарамастан, ол мұнайды терең өңдеу кешені нысанын пайдалануға беру туралы бұйрыққа қол қойған. Еске салайық, сол кезде кәсіпорынның залалы 728 млн теңгеге жуық бағаланған болатын.
Сот Данбайға мемлекеттік қызметте лауазымдарды атқаруға өмір бойы тыйым салып, 4 жыл 6 ай мерзімге бас бостандығын шектеу түріндегі жаза тағайындады.
Бұған дейін Шұхрат Данбай лауазымдық өкілеттіктерін теріс пайдаланғаны және бөтеннің мүлкін иемденгені үшін үш түрлі эпизод бойынша сотталған болатын, ол үшін 3,5 жыл бас бостандығын шектеу алған.