Солтүстік Қазақстан облысының прокуратурасы жеке сот орындаушылары (ЖСО) тарапынан салық заңнамасының тиісінше орындалмау фактілерін анықтады.
Ведомствоның баспасөз қызметінің мәліметінше, бірқатар ЖСО 2023 жылға арналған жеке табыс салығы бойынша декларацияда көрсетілген кірістерін төмендеткен. Өңірде барлығы 25 сот орындаушысы анықталып, олар 133,5 млн теңге сомасындағы кірісті жасырған, бұл 13,2 млн теңге мөлшерінде салықтың төленбеуіне әкеп соққан.
Сонымен қатар, прокурорлар кіріс болған кезде нөлдік көрсеткіштері бар декларация беру фактісін анықтады. Мәселен, сот орындаушыларының бірі 20,8 млн теңге сомасына 459 құжатты орындап, 4,5 млн теңге алғанымен, кірістің жоқтығы туралы декларация беріп, 449 мың теңге салық төлеуден жалтарған.
Прокурорлық қадағалау шаралары қабылданғаннан кейін салық органы камеральдық бақылау жүргізді. Нәтижесінде 11 ЖСО 27,4 млн теңге сомасына нақтыланған декларациялар беріп, 2,6 млн теңге мөлшерінде салықты ерікті түрде төледі.
Қазіргі уақытта уәкілетті органдар қалған салық берешегін өндіріп алу бойынша шаралар қабылдауда.
Еске сала кетейік, былтыр мамыр айында Тараз прокурорлары жеке сот орындаушысының ақша қаражатын жымқырғанын анықтады. 46 борышкерден жиналған 3,1 млн теңгені ол өз шотына аударған.
Қыркүйек айында прокуратура актісі бойынша 50 ЖСО тәртіптік жауапкершілікке тартылып, біреуіне қатысты сот орындаушылар палатасынан шығару рәсімі басталды. Қабылданған шаралар нәтижесінде борышкерлерден 75 млн теңгеден астам сома өндірілді.
Қараша басында Бас прокуратура алты ай бойы борышкерлерден алимент төлемдерін алып, жеке қажеттіліктеріне жұмсаған жеке сот орындаушысының (ЖСО) алименттерді жымқырғаны туралы хабарлады. Нәтижесінде 34 бала 1,2 млн теңге көлемінде зиян шеккен.
Сол кезде Алматы прокурорлары алимент өндіріп алуға байланысты алты өндіріс бойынша ЖСО тарапынан бұзушылықтарды анықтады.
Мамыр айында Маңғыстау облысында сот орындаушысы өндіріп алушының өтінішін жалған жасап және тыйым салуды заңсыз болдырмаған, ол үшін борышкерден ақшалай сыйақы алған.