Шымкентте 137 мың оқушыны тамақтандыруға 13 млрд теңге бөлінді.
24.kz деректері бойынша, қалалық білім басқармасы енді оқушылардың ата-аналары әр апта сайын келіп, балаларына не беріліп жатқанын көре алатынын хабарлады.
«Біз осындай келісімге келдік. Бірақ бұл ретте олардың қолында санитарлық кітапшалары, денсаулық жағдайы рұқсат ететіні және балалардың денсаулығы мен өміріне ешқандай қауіп төндірмейтіні туралы құжаттар болуы керек. Сондай-ақ олар тиісті киімде – халат, бас киім киюі тиіс», - деді басқарма басшысы Нұргүл Шамшиева.
Бұдан басқа, асхана жетекшілеріне апталар бойынша ұсынылатын мәзір жіберілді. Бұл «гастрономиялық тәжірибелерді» болдырмауға мүмкіндік береді деп күтілуде.
Қазір комиссия асханалардың оқушыларды қабылдауға дайындығын бағалауда. Прокурорлар тиісті ветеринариялық-санитарлық қорытындыларсыз қызмет көрсетуге байланысты бұзушылықтарды анықтағаны, алайда кемшіліктер жедел жойылғаны атап өтілді.
Еске сала кетейік, мамыр айында белгілі болғандай, елордалық балабақша меңгерушілері сатып алынбаған азық-түлік өнімдеріне өтінім беріп, жалған құжаттар рәсімдеген. Осылайша жымқырылған ақшаны кейіннен ЖШС директорының шотына аударған. Келтірілген залал 35 млн теңге сомасына бағаланған.
Нәтижесінде бірінші сатыдағы сот меңгерушілерге 3 жыл бас бостандығынан айыру жазасын тағайындаған. ЖШС директоры 4 жыл бас бостандығынан айыруға сотталған.
Кейін апелляциялық сот бірқатар жеңілдететін мән-жайларды ескере отырып, меңгерушілердің нақты жаза мерзімін бас бостандығын шектеуге ауыстырған.