Шымкентте жолға белгісіз сұйықтық төгілгеннен кейін 22 адам медициналық көмекке жүгінді.
24.kz мәліметінше, зардап шеккендер жол жиегінде тұрған сыйымдылығы бар жүк көлігінің жанынан өтіп бара жатқанда, одан сары түсті сұйықтық ағып, газдың жағымсыз иісі шыққаннан кейін өздерін нашар сезінген.
Төтенше жағдайлар департаменті ағып кетуді жойып, көлік елді мекендерден қауіпсіз қашықтыққа айдап әкеткені хабарланды. Өз кезегінде жүк көлігінің жүргізушісі сыйымдылықтың ішінде не барын білмейтінін мәлімдеді.
Экология департаментінің деректері бойынша, ауада аммиак, пропан, метан және мұнай көмірсутегінің шекті мөлшерден асқаны тіркелді. Қазір зертханада бұл қандай сұйықтық екені анықталуда.
«Көптеген тұрғындар мен жанынан өтіп бара жатқандар тұншықтыратын өткір иісті сезінді. Олардың ішінде 2021 және 2023 жылы туған екі бала болды. Алғашқы көмек көрсетілді. Қазіргі уақытта барлық науқас ем алып, үйлеріне жіберілді», – деді Гипербарлық оксигенация орталығының бас дәрігері Мадина Ермаханбетова.
Еске сала кетейік, бұған дейін Ақтауда екі кішкентай бала қайтыс болған еді, олардың астыңғы қабаттағы көршісі пәтерді қандалаға қарсы препаратпен өңдегеннен кейін белгісіз заттан уланған. Кейін сот әйелді кінәлі деп тауып, оған 5 жыл бас бостандығынан айыру жазасын тағайындады.
Сондай-ақ, Ақтөбедегі бес қабатты үйдің құрылыс салушысы жергілікті тұрғындарды ескертпей, жертөлені хлормен дезинсекциялағаны хабарланған болатын. Нәтижесінде үй тұрғындары хлор буынан уланған, олардың бәрінде бірдей белгілер байқалған: көздері жасаурап, тамақтары қыжылдап, тыныс алу қиындаған.
Сонымен қатар, өткен жылдың жазында ФБРК редакциясы Қазақстанда жәндіктерді немен уландыратыны туралы бірқатар материалдар жариялаған болатын. Біз ауыл шаруашылығында қолданылатын пестицидтердің қаншалықты қауіпті екенін және олардың тірі организмдерге, соның ішінде адамдарға қандай теріс әсер етуі мүмкін екенін бірнеше рет атап өттік.