Прокуратура Бородулиха ауданы Абай облысы «Семей Орманы» мемлекеттік орман табиғи резерваты» РММ филиалының қызметінде өрескел бұзушылықтарды анықтады.
Ведомство баспасөз қызметінің мәліметінше, мекеме штатына бұрын орманды заңсыз кесу және бөтеннің мүлкін ұрлау үшін қылмыстық жауапкершілікке тартылған адамдар қабылданған. Сонымен қатар, филиалға жүргізуші куәлігінен айырылған арнайы техника жүргізушісі жұмысқа орналастырылған.
Бұдан басқа, орман дайындау заңдылығын бақылауды бұрын мүліктік қылмыстар үшін сотталған өндірістік учаске шебері жүзеге асырған. Сондай-ақ, прокурорлар дайындалған орман санатын құнсызға заңсыз өзгерту фактілерін анықтаған, бұл ағаш құнының төмендеуіне әкелген.
Басшылықтың әрекетсіздігі және жұмысты тиімсіз ұйымдастыру салдарынан кәсіпорын 4 мың текше метрден астам ағашты 80 млн теңгеден астам сомаға өткізбеген. Бұл қаражат филиалдың шамамен 75 млн теңге көлеміндегі салық берешегін толық жабуы мүмкін еді.
Қадағалау шараларының қорытындысы бойынша бұзушылармен еңбек шарттары бұзылды, дайындалған ағашты өткізу басталды, сондай-ақ салық берешегін өтеу бойынша шаралар қабылдануда.
Филиал директоры қатаң сөгіс түріндегі тәртіптік жауапкершілікке тартылып, атқаратын лауазымынан босатылды.
Еске сала кетейік, бұған дейін мамандандырылған табиғат қорғау прокуратурасы анықтағандай, «Семей Орманы» табиғи резерваты 2024 жылға арналған салық мәліметтерін толық көлемде жібермеген. Ақпарат ұсынылмауы салдарынан бюджетке 200 млн теңгеден астам сомаға салық түспеген.