34 ұшқышсыз ұшу аппараты (ҰҰА) және бір квадрокоптерді ресейлік кеден қызметкерлері Қазақстаннан Башқұртстанға бара жатқан автокөлікті тексеру кезінде тапты.
Ресей Федерациясының федералды кеден қызметінің мәліметі бойынша, мобильді топ қызметкерлері көлікті «Сағаршын» халықаралық автомобиль өткізу пунктінің маңында тоқтатты.
Тәркіленген жабдықтардың арасында – бейнені нақты уақыт режимінде жіберуге арналған камералары бар FPV-дрондар, сондай-ақ екі FPV-қанаты «Ключ-Фортуна». Тауарға ілеспе құжаттарда ұшқышсыз аппараттар туралы мәліметтер болмаған.
Жүкті алып жүрген ер адам дрондардың өзіне тиесілі екенін және жеке бейнетүсірілім үшін қолданылатынын мәлімдеді. Алайда ведомство мұндай көптеген ұшу аппараттары жеке қажеттіліктерге арналмағанын және қауіпсіздікке ықтимал қауіп төндіретінін атап өтеді.
Сарапшының алдын ала кеңесі көрсеткендей, партияда 5 кг-ға дейін жүк тасымалдай алатын екі ұшақ типті ұшқышсыз аппарат, бір барлау ҰҰА, сондай-ақ 32 шағын көлемді аппаратты құрастыруға арналған жиынтықтар бар, олардың конструкциясы жүкті тастауды көздейді.
Жүк ұсталды, сараптама тағайындау мәселесі шешілуде.
Естеріңізге сала кетейік, өткен жылдың мамыр айында Штутгартта санкцияларды айналып өту үшін Германия мен Ресейдің қос азаматтығы бар екі бизнесмен сотталған болатын. Олар Ресей Қарулы күштеріне 10 «Орлан» ҰҰА жеткізді деп айыпталды.
Ұшқышсыз аппараттардың компоненттері Қазақстандағы, Қырғызстандағы, Гонконгтағы, Түркиядағы және БАӘ-дегі жалған компанияларға жеткізілгені атап өтілді. Ол жерден оларды ресейлік әскери жеткізушілерге жіберген.