ҚР Мемлекеттік кірістер комитеті (МКК) Ресей Федерациясының федералдық кеден қызметінің Қазақстаннан әкелінген ұшақтарды ресейлік кеден органдарының ұстағаны туралы жарияланымына түсініктеме берді.
МКК баспасөз қызметінің мәліметінше, бұл ақпарат дұрыс емес. Шын мәнінде, 13 маусымдағы оқиға туралы айтылып отыр, онда ҚР ҰҚК шекара қызметінің қызметкерлері «Жайсан» автомобиль өткізу пунктінде Ресейден Қазақстанға қажетті құжаттарсыз әкелу әрекеті кезінде ұшқышсыз ұшу аппараттарын (ҰҰА) ұстаған.
Ведомство жүкті тексеру үшін мемлекеттік кірістер органдарына тапсырғанын атап өтті. Уәкілетті орган дрондардың әкелуге рұқсат етілген тауарларға жататынын растады.
Материалдар сотқа жолданды, сот жүк иесін кінәлі деп танып, айыппұл салды. Рәсімдер аяқталғаннан кейін ҰҰА иесіне Ресейге кері шығару шартымен қайтарылды.
«2025 жылғы 15 қыркүйекте көрсетілген тауар Ресей Федерациясына шығарылды, бұл туралы көршілес тарап қолданыстағы екіжақты тәртіпке сәйкес тиісті түрде хабардар етілді», - делінген хабарламада.
Еске салайық, бұған дейін Ресей Федерациясының федералдық кеден қызметі Қазақстаннан Башқұртстанға бет алған көлікті тексеру кезінде 34 ҰҰА және бір квадрокоптерді ұстағаны туралы хабарлаған еді.
Партияда 5 кг-ға дейінгі жүкті тасымалдай алатын екі ұшақ типті ұшқышсыз ұшу аппараты, бір барлау ҰҰА, сондай-ақ конструкциясы жүк тастауды көздейтін 32 шағын көлемді аппаратты құрастыруға арналған жиынтықтар болғаны хабарланды.