Денисов аудандық сотында Қостанай облысы бұрынғы учаскелік полиция инспекторы сотталды. Ол алаяқтық жасады деп айыпталды.
Қостанай облысы соттарының баспасөз қызметінің мәліметінше, 2022 жылғы қазаннан 2023 жылғы маусымға дейін полиция капитаны ауылдастарының сенімін теріс пайдаланып, әртүрлі сылтаулармен оларды несие рәсімдеуге көндірген.
Ақшаны қолына алған соң, сотталушы оны «OlimpBet» букмекерлік кеңсесінде және «Loto Club» лотерея клубтарында ұтылдырған. Сондай-ақ ол басқа азаматтар алдындағы қарыздарын ішінара төлеген. Жалпы залал сомасы 31 млн теңгеден асқан.
Сотта сотталушы кінәсін мойындап, істеген ісіне өкінген. Іс бойынша жәбірленушілердің көпшілігі соттан оны бас бостандығынан айырмауды сұрағаны атап өтіледі.
Нәтижесінде сот бұрынғы полицейге орташа қауіпсіздіктегі қылмыстық-атқару жүйесі мекемесінде 3 жыл 1 ай мерзімге бас бостандығынан айыру жазасын тағайындады.
Еске сала кетейік, бұған дейін хабарланғандай, Жамбыл облысының полиция қызметкері азаматқа синтетикалық есірткі сатып алуға ақша беріп, кейін ұстаған. Үкім шығарылғаннан кейін ведомствоға сотталғанның адвокаты жүгінген. Ол өзінің қорғауындағы адамға қатысты полиция қызметкерлері тарапынан жасалған арандатушылық туралы айтқан.