Ақмола гарнизонының әскери соты гашиш таратқан подполковникті 9 жылға бас бостандығынан айыруға үкім шығарды.
Informburo.kz деректері бойынша, ол тұрғын үйдің терезелерінің торларына магниттермен бекітіп, гашиш майы салынған колбаларды жайып жатқан кезде ұсталды.
«Жеке тінту нәтижесінде жалпы салмағы 23,62 грамм «гашиш майы» есірткі заты бар 34 колба және жеті шприц алынды», – делінген хабарламада.
Сотталған адам әскери атағынан да айырылды. Сонымен қатар, одан Жәбірленушілерге өтемақы қорына 69 мың теңге өндірілді. Үкім заңды күшіне енген жоқ деп хабарланады.
Еске сала кетейік, бұған дейін ҚР ІІМ ресми өкілі Шыңғыс Алекешев өткен жылы ведомство құқық қорғаушылардың үш фактіде есірткі сатқанын анықтағанын айтқан болатын. Спикер сондай-ақ полиция қатарындағы қылмыстардың 80%-ы өздігінен анықталатынын мәлімдеді.