(2 наурыз 2026 | Дереккөз: Hronika.kz)
Шығыс Қазақстан облыстық орталығының әуе қақпасының бұрынғы басшысы лауазымдық өкілеттіктерді теріс пайдаланғаны және шығынға ұшыратқаны үшін кінәлі деп танылды. Сот сонымен қатар акционер мен бақылаушы органдар тарапынан стратегиялық нысанға тиісті бақылаудың жоқтығын атап өтті.
ПРОЦЕСС БАРЫСЫНДА НЕ АНЫҚТАЛДЫ
Hronika.kz-ның мәліметінше, тергеу нұсқасы бойынша, әуежайдың бұрынғы басшысы мен акционерлік қоғамның басқа да лауазымды тұлғалары бірнеше жыл бойы жалақыны көтеріп көрсету, жалған сыйақылар есептеу және өтірік келісімшарттар жасасуға байланысты схеманы ұйымдастырған.
Шығыс Қазақстан облысы бойынша Қаржылық мониторинг агенттігі (ҚМА) департаментінің ақпараты бойынша, қаражат кейіннен кәсіпорынның кассасы арқылы жнағыланып алынған. Тергеу сонымен қатар, көлік құралдарын аффилирленген тұлғаларға нарықтық бағадан төмен сату және коммерциялық жылжымайтын мүлікті төмендетілген тарифтермен жалға беру фактілерін анықтады.
Мемлекетке келтірілген жалпы залал 157 млн теңгені құрады. Сот санкциясымен бұрын күдіктілердің 126 млн теңге сомасына мүлкіне: төрт пәтерге, жер теліміне және екі автокөлікке тыйым салынған болатын.ҚАУІПСІЗДІК ЖҮЙЕСІНДЕ ҚАНДАЙ БҰЗУШЫЛЫҚТАР АНЫҚТАЛДЫ
Сот стратегиялық нысанның қауіпсіздік режиміндегі проблемаларды бөлек атап өтті. Әуежай аумағында шектеулі режим аймағына көліктердің тіркеусіз, тексерусіз және сүйемелдеусіз бақылаусыз кіруі іс жүзінде жұмыс істегені анықталды.
СОТ ҮКІМІ
Өскемен қаласының қылмыстық істер жөніндегі ауданаралық соты әуежайдың бұрынғы президенті Николай Короленконы 361-баптың 4-бөлігінің 3-тармағы («Лауазымдық өкілеттіктерді теріс пайдалану») және ҚР ҚК 189-бабының 4-бөлігінің 2-тармағы («Сеніп тапсырылған бөтен мүлікті иемдену немесе шығынға ұшырату») бойынша кінәлі деп таныды.
Сот оған орташа қауіпсіздік мекемесінде өтелетін 8 жыл бас бостандығынан айыру жазасын тағайындады. Сонымен қатар, оған мемлекеттік қызметте, жергілікті өзін-өзі басқару органдарында, Ұлттық банкте, квазимемлекеттік секторда және басқа да мемлекеттік құрылымдарда лауазымдарды атқаруға өмір бойына тыйым салынды.Сот оны мемлекетке 120 млн теңге өтеуге міндеттеді. Сотталушы сот залында қамауға алынды. Үкімге апелляциялық сатыда шағым жасалуы мүмкін және әлі заңды күшіне енген жоқ.
Бастапқыда айыптау сыбайлас жемқорлық эпизодтарын қамтыған, алайда процес барысында мемлекеттік айыптау олардан бас тартты.
НЕЛІКТЕН СОТ ЖЕКЕ ҚАУЛЫ ШЫҒАРДЫ
Сот үкіммен бір мезгілде ШҚО әкімдігінің атына жеке қаулы шығарды. Құжатта 2018–2023 жылдары әуежайдың жалғыз акционері — облыстық әкімдікке тиесілі «Ертіс» әлеуметтік-кәсіпкерлік корпорациясы (ӘКК) — кәсіпорын қызметіне тиісті корпоративтік және қаржылық бақылауды қамтамасыз етпегені көрсетілген.
Атап өтілгендер:- директорлар кеңесі мен комиссиялар жұмысының формалды сипаты;
- қаржылық тәртіптің бұзылуына уақтылы ден қоюдың болмауы;
- мемлекеттік мүлікті сақтау бойынша шаралардың жеткіліксіздігі;
- ішкі бақылау мен аудиттің формалды жұмыс істеуі.
Соттың бағалауы бойынша, бақылаудың әлсіреуі қылмыстық құқық бұзушылықтардың жасалуына ықпал еткен жағдайларды тудырды.
БАСҚА ӘУЕЖАЙЛАР БОЙЫНША ШЕШІМДЕР
Еске сала кетейік, 23 ақпанда Түркістан қаласының Әкімшілік құқық бұзушылықтар жөніндегі мамандандырылған ауданаралық соты «Түркістан халықаралық әуежайы» АҚ-ны монополияға қарсы заңнаманы бұзғаны үшін кінәлі деп таныды. Компания кәсіпкерлерден әуежай аумағында авиаотын сату құқығы үшін алым алған. Сот 14,3 млн теңге көлемінде әкімшілік айыппұл салды.
Бұған дейін, 19 ақпанда Бәсекелестікті қорғау және дамыту агенттігінің (БҚДА ҚР) департаменті «Семей халықаралық әуежайы» ЖШС-не қатысты тергеуді аяқтады. Сот авиаотынға жоғары баға белгілеу кезінде үстем жағдайын теріс пайдаланғаны үшін компанияны әкімшілік жауапкершілікке тартып, 8,8 млн теңге айыппұл және 8,5 млн теңге кірісті тәркілеу жазасын тағайындады.