«Qazaq Stroy» компаниясының иесі Нұрлан Артықбаев «Ақтөбе» футбол клубының инвесторы болды.
«Келісімге қол жеткізілді, футбол клубы Нұрлан Артықбаевтың қамқорлығына өтеді», — деді дереккөз Forbes.kz.
Ұйымдастыру мәселелері мен клубты дамытуға қажетті инвестиция көлемі 2026 жылдың қаңтарында талқыланатыны атап өтілді. Команда құрамындағы ықтимал өзгерістер немесе футбол интернатын салу туралы әзірге хабарланған жоқ.
«Ақтөбе» жанкүйерлері клубтағы болашақ өзгерістерді, ойыншыларды сату және сатып алуды болжап, белсенді түрде талқылауда, алайда бұл жоспарлардың ресми растауы да жоқ.
Қараша айының басында Ақтөбе облысының әкімі Асхат Шахаров ФК-ны жеке қолға беру бойынша түпкілікті шешімді жыл соңына дейін қабылдайтынын хабарлаған еді, алайда инвестордың аты ресми түрде аталмады.
Белгілі болғандай, Нұрлан Артықбаев — Алматы мен Астанада тұрғын үй кешендерін салуға маманданған «Qazaq Stroy» компаниясының негізін қалаушы және мажоритарлық иесі.
Мамыр айында ол алғаш рет Forbes Kazakhstan рейтингіне еніп, $228 млн (118,7 млрд теңге) байлығымен 75 ең бай бизнесмен арасында 44-орынды иеленді. Qazaq Stroy да Қазақстанның 75 ірі компаниясының рейтингінде алғаш рет көрініп, 313,9 млрд теңге түсім және 45,7 млрд теңге таза пайдамен 14-орынға ие болды.
Еске сала кетейік, бұған дейін премьер-министр Олжас Бектенов футбол клубтарын және олардың инфрақұрылымын жекешелендіру процесі белсенді кезеңде екенін хабарлаған болатын.
«Freedom Finance» АҚ «Шахтер» ФК үшін стадион мен футбол академиясын салуды жоспарлап отырғаны атап өтілді.
«Kaspi Group» АҚ «Жеңіс» ФК сатып алып, Астанада футбол инфрақұрылымын дамытуға ниетті. Сонымен қатар, министрлік «Тараз», «Елімай» және «Ертіс» клубтары бойынша инвесторлармен келіссөздер жүргізуде.
Қазан айының соңында «Қайсар» ФК кәсіпкер Исламғали Қозбақов, «TAU Group LTD», «Алем строй» компаниялары мен бетон зауытының иесі сатып алғаны белгілі болды.
Қараша айында Петропавлда «Қызыл-Жар» ФК спорттық брендін, инфрақұрылымы мен активтерін «Орталық-Азия Электр Энергетикалық Корпорациясы» АҚ тең иелерінің бірі Сергей Канға беру туралы келісімге қол қойылды.