Орал қаласының тұрғындары Наталья Бухтина мен Ирина Котович 2024 жылдың 16 сәуірінде су тасқыны салдарынан үйлері су астында қалғанын, бірақ әлі күнге дейін жаңа баспана алмағандарын мәлімдеді.
Informburo.kz мәліметінше, Наталья Бухтина үш баласымен жалдамалы пәтерде тұратынын, оны өз қаражаты есебінен төлейтінін айтты. Ирина Котович екі кәмелетке толмаған баласымен әлі күнге дейін авариялық деп танылған, көгеріс пен зең пайда болған үйде тұрып жатыр.
Екі әйел де үйлері техникалық сараптамадан өтіп, тұруға жарамсыз деп танылып, бұзуға жататынын хабарлады. Дегенмен, олардың айтуынша, әкімдік баспана беруден бас тартқан.
Өз кезегінде әкімдік өкілдері Ирина Котовичтің жағдайында бас тарту себебі оның үйін төтенше жағдай режимі енгізілгеннен кейін, яғни 2024 жылдың 18 сәуірінде тіркеуге алуына байланысты екенін мәлімдеді.
Сонымен қатар әкімдікте Котовичке біржолғы материалдық көмек – 100 АЕК (369 200 теңге) және бүлінген мүлік үшін өтемақы ретінде 553 800 теңге төленгенін нақтылады.
Наталья Бухтинаның жағдайында әкімдік оның бақша үйі жазғы үй деп танылып, жыл бойы тұруға арналмағанын атап өтті. Сонымен қатар, жергілікті биліктің ақпараты бойынша, Бухтинаның атына басқа жылжымайтын мүлік объектісінде үлес (50%) тіркелген.
Оған да материалдық көмек – 100 АЕК (369 200 теңге) және бүлінген мүлік үшін шығынды өтеу ретінде 299 503 теңге төленген.
Еске сала кетейік, былтырғы шілде айында премьер-министр Олжас Бектенов су тасқынынан кейін тұрғын үй мен инфрақұрылымды қалпына келтіру мәселелері бойынша кеңес өткізіп, онда кейбір өңірлердің жұмыс кестесінен 15-25 күнге артта қалып жатқанын атап өтті. Кейінірек ол су тасқынынан зардап шеккендерге үй салу барысын тексеру үшін елдің батыс өңіріне барды.
Сонымен бірге Қазақстан үкіметі су тасқынының салдарын жою және қираған инфрақұрылымдық объектілерді қалпына келтіру үшін төтенше резервтен қосымша 22,7 млрд теңге бөлгені хабарланды.
Қаражат Ақмола, Ақтөбе, Қостанай және Солтүстік Қазақстан облыстарында жолдар мен көпірлерді, сондай-ақ су өткізу құрылыстарын қалпына келтіру және салу үшін әкімдіктерге жіберілетіні атап өтілді.
Сондай-ақ үкіметте су тасқынынан кейін резервтен бизнестің мүліктік шығындарын өтеуге 12 млрд теңге бөлінгені хабарланды.
Одан бөлек, вице-премьер Қанат Бозымбаев су тасқынынан зардап шеккен өңірлерге көмек көрсеткен кәсіпкерлердің есімдері мен қаржылай көмек сомалары көрсетілген кестені ұсынды.