Жуықта грек аралы Идрада үлкен өрт болды. Өрт люкстік яхтада демалатын туристер атқан фейерверктерден пайда болғаны хабарланады. Белгілі болғандай, бұл кемені туристік маусымда жалдау аптасына €299 мың (шамамен 149 млн теңге) тұрады.
ORDA деректері бойынша, жалынды сөндірген кезде, ол шамамен 1,2 мың га аумақты қамтып үлгерген.
Өз кезегінде, арал билігі орман өртеу үшін өтемақы талап ететіндерін мәлімдеді. Грекияда орман өртеу және қоршаған ортаға зиян келтіру үшін 20 жылға дейін бас бостандығынан айыру және €200 мыңға дейін айыппұл қарастырылған.
Алайда туристердің заң алдында жауап беруге міндетті емес екендігі, оның орнына жауапкершілік яхта экипажына жүктелетіні хабарланады. Айта кетейік, бастапқыда өртті шығарған туристер Қазақстан азаматтары деп айтылған еді, бірақ кейін грек БАҚ бұл пәкістандықтар екенін мәлімдеді.
Журналистер туристер жалдаған кеменің люкстік серуен яхтасы «Персефона I» екенін анықтады.
«Бұл грек теңіздері мен жағалауларын зерттеуге өте ыңғайлы, керемет яхта. Еуропалық шеберлердің әдемі мүсіндері оның ішкі көрінісін безендірген. «Персефона» күн ванналары, кешкі астар, қарым-қатынас және демалу үшін ыңғайлы бұрыштарды ұсынады. Яхтада сәнді джакузи, тамаша кинотеатр және спорт залы бар», - делінген «Персефонаның» сипаттамасында яхталарды таңдау сайттарының бірінде.
Өз кезегінде, «Чемодан госсекретов» Telegram-арнасының дереккөздері фейерверк атқан деп күдіктелген туристердің ішінде қазақстандық кәсіпкер Данияр Әбілғазин болғанын хабарлайды. Ол 380 млн доллар активтерге ие және Құлыбаевтың серіктесі болған.