В Сингапурда халықаралық киберқылмыстық топта жұмыс істеген Қытайдың үш азаматы ұсталды. Олардың ноутбуктерінен бірнеше шетелдік ведомстволардың қызметіне қатысты файлдар, соның ішінде Қазақстанның сыртқы істер министрлігі мен индустрия және инфрақұрылымдық даму министрлігі қызметкерлерінің хат-хабарлары табылды.
ORDA сингапурлық The Straits Times газетіне сілтеме жасап хабарлағандай, ұсталғандар — Лю Юйци, Хуан Циньчжэн және Янь Пэйцзянь. Сингапур құқық қорғау органдарының мәліметінше, үш ер адам өткен жылдың қыркүйек айында жеке деректер жинау және үкіметтік ресурстарды бұзу әрекеттері үшін елге келген.
Ұсталғаннан кейін полиция құрылғыларға техникалық сараптама жүргізді. 33 жастағы Лю Юйцидің ноутбугінен қазақстандық мемлекеттік органдар қызметкерлерінің арасындағы құпия қызметтік хат-хабарлар табылды. Хат-хабардың сипаты мен мазмұны ашылмайды. Қазақстандық мемлекеттік органдар пайда болған ақпаратты ресми түрде түсіндірмеген.
Сонымен қатар, күдіктілердің құрылғыларынан қашықтан қол жеткізуге арналған RAT-бағдарламалары мен PlugX — жекелеген мемлекеттік құрылымдардың мүддесінде әрекет ететін топтармен бұрын байланыстырылған зиянды бағдарламалық қамтамасыз етудің танымал түрі қоса алғанда, жүздеген зиянды құралдар табылды.
Яннің ноутбугінен Австралия, Аргентина және Вьетнам мемлекеттік мекемелерінің сайттарының осалдықтарын талқылайтын хат-хабарлар анықталды. Хуаннан филиппиндік энергетикалық компанияның клиенттерінің жеке және төлем деректері бар құжаттар табылды.
Нәтижесінде, Сингапурдағы сот ұсталғандардың әрқайсысына екі жыл бес ай бас бостандығынан айыру жазасын тағайындады. Үкім заңды күшіне енді.