Марқұм Eurasian Resources Group (ERG) бірлескен иесі Александр Машкевичтің мұрагерлерімен байланысты компаниялар Майамидегі Фишер-Айленд аралында шамамен $14 млн (7 млрд теңгеден астам) сомасына жылжымайтын мүлікке ие.
Telegram-арнасының «Выход к морю» мәліметінше, Фишер-Айленд АҚШ-тағы «ең қымбат жер» деп аталады. Жылжымайтын мүліктің әлеуетті иелері үшін кіру жарнасы $250 мыңды, ал жергілікті тұрғындардың орташа жылдық табысы $2,5 млн-нан асады.
Арал өзінің мектебі, ауруханасы, теннис корттары, гольф-клубы және яхталарға арналған маринасы бар жабық және күзетілетін аумақ болып табылады. Оған тек су арқылы немесе жеке тікұшақпен жетуге болады.Майами-Дейд округі әкімшілігінің деректері бойынша, мұнда әлемнің 40 елінен шамамен 700 отбасы тұрады, оның ішінде Джулия Робертс, Опра Уинфри, ресейлік миллиардерлер Виктор Вексельберг және Араз Агаларов сияқты танымал адамдар бар.
Қолда бар ақпарат бойынша, Александр Машкевичтің қызы Анна аралда үш компанияны — Alm Florida Property Inc, Alm Florida Property II Inc және Alm Florida Property III Inc басқарады. Бұл компаниялар Люксембургте тіркелген құрылым арқылы Машкевич пен оның жұбайы Ларисаға тиесілі.
Олардың Фишер-Айлендтегі меншігінде екі пәтер бар. Оның біреуін, ауданы шамамен 630 м², Машкевичтер 2008 жылы поляк бизнесмені Рышард Краузеден $3,5 млн-ға сатып алған. Бір кездері Польшаның ең бай адамдарының бірі болған Краузе Қазақстандағы мұнай өндіруге инвестиция салған, бірақ күйреген, ал оның құрылымдары қазақстандық кредиторларға 20 млрд теңгеден астам қарыз болған.
Қазіргі уақытта бұл жылжымайтын мүліктің құны үш есеге жуық өсіп, $9,5 млн-ға жетті. Сол ғимараттағы екінші пәтер, ауданы кішірек, $3,5 млн-ға бағаланады. Сондай-ақ, отбасы яхта айлағының жанындағы шағын пәтерге ие. Оның ауданы 50 м²-ден сәл астам, ал құны шамамен $1 млн құрайды.
Еске сала кетейік, бұған дейін журналистер марқұм қазақстандық бизнесмен Александр Машкевичтің мүліктік портфелінен бірегей активті — Францияның оңтүстігіндегі, бір кездері африкалық диктатор Мобуту Сесе Секоға тиесілі болған вилланы тапқан болатын. 3,2 гектар жер теліміндегі, құны €120-150 млн болатын ерекше үй Рокебрюн-Кап-Мартен әсем коммунасында орналасқан.