Қызылорда облысының полицейлері БҚО-да ел аумағында интернет-алаяқтықпен айналысқан қылмыстық топты ұстады.
Polisia.kz деректері бойынша, күдіктілерді тінту кезінде 16 ұялы телефон, бірнеше пайдаланылған SIM-карта, роутер және 3,5 млн теңге көлеміндегі қолма-қол ақша алынды.
Белгілі болғандай, олар Қызылорда облысының тұрғындарына: «кредит тарихын жақсартып, ақша алу бағдарламасын жасаймыз» деген жалған ақпарат жіберіп, IP-мекенжайын және ақшасын алған банктік шотын жасырған.
Қылмыскерлер 45 млн теңге ұрлады деп күдіктеледі. Күдіктілерге қатысты тергеу соты 2 ай мерзімге қамауда ұстау түріндегі бұлтартпау шарасын таңдады.
Қазіргі уақытта қылмыстық іс бойынша қажетті тергеу әрекеттері жүргізілуде.
Еске сала кетейік, сәуір айында Жетісу облысында әйел отбасы досының смартфонын пайдаланып, 1 млн теңгеден астам сомаға кредиттер мен онлайн-қарыздар рәсімдеген. Жәбірленуші әр жолы олардың үйіне қонаққа келгенде, алаяқ әйел смартфонды тексеру сылтауымен оған жаңа қарыздар рәсімдеп отырған. Жәбірленуші банк қызметкерлері кредиттерді өтеу қажеттігі туралы хабарласқанша ешнәрседен күдіктенбеген.
Қазан айында Ақкөл қаласының тұрғынын алаяқтардың алдағаны хабарланған болатын. Басшысының суретін аватар ретінде пайдаланып, қылмыскерлер әйелді бір банкте 1 млн теңгеге кредит рәсімдеуге көндіре алған.
Жақында Қазақстанның Жоғарғы соты кредит ұйымдарын азаматтарға алаяқтар рәсімдеген кредиттерді есептен шығаруға міндеттейтін заң енгізуді ұсынды.