(12 наурыз 2026 | Дереккөз: ҚР Ұлттық қауіпсіздік комитеті)
Қазақстан Республикасының Ұлттық қауіпсіздік комитеті (ҰҚК) ФБРК редакциясына аграрлық бақылау жүйесіндегі ықтимал сыбайлас жемқорлық туралы журналистік сұраудан кейін сотқа дейінгі тергеп-тексеру жүргізіліп жатқанын хабарлады. Ведомство лауазымды тұлғаны ұстауы мүмкін деген мәліметті растамады, бірақ жоққа да шығармады.
РЕДАКЦИЯ НЕНІ СҰРАДЫ
ФБРК редакциясына Қазақстан Республикасы Ауыл шаруашылығы министрлігінің (АШМ) агроөнеркәсіптік кешендегі (АӨК) мемлекеттік инспекция комитетінің Түркістан облыстық аумақтық инспекциясы басшысының ықтимал ұсталуы туралы ақпарат келіп түсті.
Осыған байланысты ФБРК редакциясы ҰҚК-ге ресми сұрау салып, өтініш білдірді:
- ұстау фактісін растау немесе жоққа шығару;
- жедел-тергеу іс-шаралары жүргізілген-жүргізілмегенін хабарлау;
- тергеу бабын және істің процессуалдық мәртебесін нақтылау.
ҰҚК НЕ ДЕП ЖАУАП БЕРДІ
ҰҚК сотқа дейінгі тергеп-тексеру жүргізіліп жатқанын, ал өзге ақпарат ҚР ҚПК-нің 201-бабының 1-бөлігіне сәйкес жария етуге жатпайтынын хабарлады.
Осылайша, ҰҚК ықтимал ұстау туралы мәліметті растамады да, жоққа шығармады, сондай-ақ тергеу бабын және ықтимал фигуранттардың процессуалдық мәртебесін нақтыламады.
КОНТЕКСТ
Естеріңізге сала кетейік, АШМ АӨК мемлекеттік инспекция комитеті, соның ішінде шегіртке зиянкестерімен күрес жұмыстарын ұйымдастыру мен бақылауға жауапты.
Бұған дейін ФБРК редакциясы осы саладағы мемлекеттік сатып алу жүйесін талдаған болатын. Атап айтқанда, 2024 жылы үкімет резервінен шегірткемен күреске 3,2 млрд теңгеден астам бөлініп, оның негізгі бөлігі пестицидтер сатып алуға және ауыл шаруашылығы алқаптарына химиялық өңдеу жүргізуге бағытталғаны хабарланған.
ФБРК-нің жекелеген жарияланымдарында осы жұмыстарға арналған техника сатып алу да қарастырылды. Мәселен, бағдарлама қаражаты есебінен жалпы құны шамамен 368 млн теңге болатын 46 агродрон сатып алынған. Кейін оның 27-і кепілдік жөндеуге жеткізушіге берілген, алайда ашық материалдарда техниканың істен шығу себептері мен қалпына келтіру мерзімдері нақтыланбаған.
Сонымен қатар, бұған дейін БАҚ-та фитосанитарлық бақылау жүйесіне қатысты құрылымдардағы сыбайлас жемқорлық тергеулері туралы хабарланған болатын. Мәселен, Жамбыл облысында сол комитетке қарасты «Фитосанитария» РМК өңірлік филиалы басшысының міндетін атқарушы ұсталды. Ол 400 мың теңге көлемінде пара алуға күдікті.
ФБРК редакциясы жағдайдың дамуын бақылап отырады.